სომხეთის ერთ-ერთმა წამყვანმა ოპოზიციურმა ძალამ, პარტიამ „ძლიერი სომხეთი“, ქვეყნის ცენტრალურ საარჩევნო კომისიას ოფიციალური განაცხადით მიმართა. პარტია, რომლის დამფუძნებელიც რუსეთ-სომხეთის ორმაგი მოქალაქეობის მქონე მილიარდერი სამველ კარაპეტიანია, 7 ივნისს გამართული საპარლამენტო არჩევნების შედეგების გაუქმებას მოითხოვს.

ცესკოს შტაბ-ბინასთან გამართულ ბრიფინგზე პარტიის წარმომადგენელმა და საპარლამენტო მანდატის კანდიდატმა, არამ ვარდევანიანმა განაცხადა, რომ მათ მიერ წარდგენილი დოკუმენტაცია მოიცავს ყველა იმ დარღვევას, რომელიც როგორც კენჭისყრის დღეს, ისე მთლიანი საარჩევნო კამპანიის პერიოდში დაფიქსირდა.

ვარდევანიანის თქმით, მიმდინარე პროცესები სცდება დემოკრატიული საზოგადოებისთვის მისაღებ სტანდარტებს. „ვფიქრობ, ბევრი აკვირდებოდა სომხეთში მიმდინარე მოვლენებს. ის, რაც ამჟამად ხდება, დემოკრატიულ საზოგადოებაში არ უნდა ხდებოდეს“, — აღნიშნა მან.

შეგახსენებთ, რომ 7 ივნისის არჩევნების საბოლოო მონაცემებით, პრემიერ-მინისტრ ნიკოლ ფაშინიანის პარტიამ „სამოქალაქო კონტრაქტმა“ ამომრჩეველთა ხმების 49,82% მიიღო, რაც მას 105-წევრიან პარლამენტში 64 მანდატის მიღების და მყარი უმრავლესობის დაკომპლექტების საშუალებას აძლევს.

ოპოზიციური ძალების განაწილება შემდეგნაირად გამოიყურება:

  • „ძლიერი სომხეთი“ — 29 მანდატი;
  • რობერტ ქოჩარიანის ბლოკი „სომხეთი“ — 12 მანდატი.
2 ფოტო — დააჭირე გასადიდებლად

არჩევნების შემდგომი პერიოდი გეოპოლიტიკური დაძაბულობის ფონზე მიმდინარეობს. მოსკოვმა სომხური საქონლის იმპორტზე გარკვეული შეზღუდვები დააწესა, რის საპასუხოდაც ევროკავშირმა სომხეთისთვის 50 მილიონ ევროზე მეტი ფინანსური დახმარების გამოყოფის შესახებ განაცხადა. დაძაბულობის კერად რჩება თავად სამველ კარაპეტიანის ფიგურაც, რომელსაც ვლადიმერ პუტინმა საჯარო მხარდაჭერა გამოუცხადა, თუმცა პრემიერმა ფაშინიანმა ხაზგასმით აღნიშნა, რომ რუსეთის მოქალაქე სომხეთის უმაღლეს თანამდებობებს ვერ დაიკავებს. ამ ფონზე, არჩევნებამდე ცოტა ხნით ადრე, ნიკოლ ფაშინიანს საჯარო მხარდაჭერა აშშ-ის პრეზიდენტმა დონალდ ტრამპმაც გამოუცხადა.