საქართველოში საცალო ვაჭრობის დიდ ქსელებსა და სადისტრიბუციო კომპანიებს შორის ურთიერთობა იძაბება. „დისტრიბუტორთა ბიზნეს ასოციაციის“ ხელმძღვანელი, ლაშა რიჟამაძე აცხადებს, რომ ქსელური მარკეტები ხელშეკრულებების განახლებისას პირობებს ამძიმებენ, რაც პირდაპირ აისახება საბოლოო პროდუქტის ფასზე.

2 ფოტო — დააჭირე გასადიდებლად

რიჟამაძის თქმით, საუბარია იმ გადასახადების ზრდაზე, რომლებიც წინა წლებში შეთანხმებული იყო. მისი განმარტებით, დისტრიბუტორები უკვე მძიმე ტვირთს გრძნობენ, რაც გამოწვეულია სადისტრიბუციო მანქანების ჯარიმებით, ენერგომატარებლების ტარიფებითა და ბიზნესის წარმოებისთვის საჭირო დამატებითი ინვესტიციებით.

„როდესაც ქსელური მარკეტის მიერ დაწესებული გადასახადი იზრდება, ეს გარდაუვალად აძვირებს პროდუქციას მომხმარებლისთვის. სამწუხაროდ, უკვე გვაქვს შემთხვევები, როდესაც გარკვეულმა ქსელებმა არსებული პირობების გაუმჯობესება კი არა, გადასახადების ზრდა მოითხოვეს“, – აცხადებს რიჟამაძე.

სრულიად განსხვავებულ პოზიციას აფიქსირებენ საცალო მოვაჭრეები. „რითეილ ასოციაციის“ აღმასრულებელი დირექტორი, სოფო ქაშაკაშვილი გავრცელებულ ინფორმაციას უარყოფს და აცხადებს, რომ სექტორს გადასახადები არ გაუზრდია.

„ეს ინფორმაცია სიმართლეს არ შეესაბამება. არანაირი გადასახადები რითეილ სექტორის მხრიდან არ გაზრდილა. პირიქით, ჩვენი მონაცემებით, თავად დისტრიბუტორებს ჰქონდათ მოთხოვნები პროდუქციის გაძვირებაზე, რაც ამ ეტაპზე შეჩერებულია“, – აღნიშნავს ქაშაკაშვილი.

აღსანიშნავია, რომ სექტორებს შორის არსებული ეს უთანხმოება პირდაპირ გავლენას ახდენს მომხმარებლის კალათაზე. მაშინ, როდესაც ბიზნესის წარმომადგენლები ერთმანეთს ადანაშაულებენ, ფასების ცვლილება ყოველდღიური მოხმარების პროდუქტებზე კვლავ აქტუალურ გამოწვევად რჩება.