სახალხო დამცველის 2024 და 2025 წლების ანგარიშებში საპროტესტო აქციების მონაწილეთა მიმართ განხორციელებული ძალადობა მკაცრად არის შეფასებული. დოკუმენტებში ნათქვამია, რომ არასათანადო მოპყრობა, მათ შორის წამება და არაადამიანური ქმედებები, სისტემურ და მასშტაბურ ხასიათს ატარებდა.

სტატისტიკა და მსხვერპლთა ჩვენებები

მონაცემების თანახმად, 2024 წლის 28 ნოემბრიდან 2025 წლის 1 მარტამდე სახალხო დამცველის წარმომადგენლებმა 442 პირი მოინახულეს. მათგან 267 ადამიანი, ანუ გამოკითხულთა 60%, პირდაპირ მიუთითებდა არასათანადო მოპყრობის ფაქტებზე.

ცალკე კვლევა, რომელიც 2024 წლის არჩევნების შემდგომ პერიოდს მოიცავს, კიდევ უფრო მძიმე სურათს ხატავს. 117 რესპონდენტიდან 77.7% აცხადებს, რომ პოლიციამ მათ მიმართ ძალადობა გამოიყენა. მსხვერპლთა თქმით, სპეცრაზმი იყენებდა იდენტურ მეთოდებს: უსაფუძვლო დაკავებას, ცემას და პოლიციის კორდონის მიღმა გადაყვანას, სადაც ძალადობა უფრო ინტენსიური ხდებოდა.

ძალადობის მეთოდები

ანგარიშში დეტალურადაა აღწერილი ძალადობის პროცესი. მსხვერპლები მიუთითებენ, რომ მათ სადამსჯელო მიკროავტობუსებში სცემდნენ. სპეცრაზმელები იყენებდნენ როგორც ხელებს, ისე კეტებსა და სხვა ხელსაწყოებს. ფიზიკურ ანგარიშსწორებას თან ახლდა დამცირება, მუქარა და პირადი ნივთების წართმევა.

გამოძიების კვალიფიკაცია

სახალხო დამცველი ხაზს უსვამს, რომ გამოძიების კვალიფიკაცია უდიდესი პრობლემაა. მიუხედავად იმისა, რომ 154 პირს ოფიციალურად აქვს დაზარალებულის სტატუსი, გამოძიება მხოლოდ სამსახურებრივი უფლებამოსილების გადამეტების მუხლით მიმდინარეობს.

ომბუდსმენის შეფასებით, ეს მუხლი ვერ ასახავს იმ სიმძიმესა და ინტენსივობას, რაც აქციების დროს დაფიქსირდა. ამ დროისთვის პასუხისგებაში მხოლოდ 5 პოლიციელია მიცემული, რაც, უფლებადამცველების აზრით, არ შეესაბამება დანაშაულის მასშტაბებს.