თბილისში, ისანი-სამგორის რაიონში, პოლიციამ ყოფილი მეუღლის მკვლელობის მცდელობის ბრალდებით ერთი პირი დააკავა. შინაგან საქმეთა სამინისტროს ცნობით, სამართალდამცველებმა ბრალდებული ცხელ კვალზე აიყვანეს.

გამოძიების პირველადი ვერსიით, ინციდენტს წინ უძღოდა ბრალდებულსა და დაზარალებულს შორის წარსულში არსებული კონფლიქტი. დაპირისპირებისას მამაკაცმა ყოფილ მეუღლეს ცივი იარაღით სხეულის მრავლობითი ჭრილობები მიაყენა.

3 ფოტო — დააჭირე გასადიდებლად

დაჭრილი ქალი სასწრაფო სამედიცინო დახმარების ბრიგადამ კლინიკაში გადაიყვანა. ამ დროისთვის მისი ჯანმრთელობის მდგომარეობის შესახებ დამატებითი დეტალები არ ვრცელდება.

საქმეზე გამოძიება საქართველოს სისხლის სამართლის კოდექსის 11 პრიმა 19-109-ე მუხლის „კ“ ქვეპუნქტით მიმდინარეობს. აღნიშნული მუხლი ოჯახის წევრის მიმართ დამამძიმებელ გარემოებებში ჩადენილ განზრახ მკვლელობის მცდელობას გულისხმობს.

დანაშაული სასჯელის სახით 20 წლამდე ან უვადო თავისუფლების აღკვეთას ითვალისწინებს. შინაგან საქმეთა სამინისტრო აგრძელებს საგამოძიებო მოქმედებებს მომხდარის დეტალების სრულად დადგენის მიზნით.