უკრაინასა და უნგრეთს შორის ეთნიკური უმცირესობების უფლებებთან დაკავშირებით მნიშვნელოვანი შეთანხმება შედგა. უნგრეთის საგარეო საქმეთა მინისტრ ანიტა ორბანის განცხადებით, კიევი უნგრულ ეთნიკურ უმცირესობას საჯარო სფეროში მშობლიური ენის გამოყენების ფართო უფლებებს ანიჭებს.

შეთანხმების თანახმად, უკრაინა აღადგენს უმცირესობებისთვის განკუთვნილ სასკოლო სისტემას. ეს ცვლილება უნგრული ენის, ასევე ეროვნული სიმბოლოების, მათ შორის ჰიმნისა და დროშის, თავისუფალ გამოყენებას უზრუნველყოფს.

განსაკუთრებული ყურადღება ეთმობა იმ მუნიციპალიტეტებს, სადაც უნგრული მოსახლეობა 10%-ზე მეტს შეადგენს. ასეთ დასახლებებში უნგრული ენის გამოყენება ნებადართული იქნება ჯანდაცვის დაწესებულებებში, საჯარო ღონისძიებებსა და საარჩევნო კამპანიების დროს.

„ეს შეთანხმება არა ხმაურიანი პოლიტიკური ჟესტების, არამედ თითქმის სიზიფეს შრომის შედეგია“, — განაცხადა ანიტა ორბანმა. მისი თქმით, მხარეებმა 11 მოთხოვნიდან 10-ზე უკვე მიაღწიეს კონსენსუსს.

3 ფოტო — დააჭირე გასადიდებლად

მიუხედავად ამ პროგრესისა, გადაუჭრელი რჩება უმაღლეს რადაში ეროვნული უმცირესობების წარმომადგენლობის საკითხი. მიუხედავად ამისა, ბუდაპეშტი უკვე დათანხმდა ევროკავშირთან მოლაპარაკებების პირველი კლასტერის გახსნას.

რაც შეეხება ევროკავშირში გაწევრიანების პროცესს, მხარეები შეთანხმდნენ, რომ ეს იქნება სტანდარტული და არა დაჩქარებული პროცედურა, რომელსაც წინ რეფერენდუმი უნდა უძღოდეს. პროცესის მექანიზმებში ჩაერთვებიან ვენეციის კომისია და ეუთო.

უკრაინული მედიის ინფორმაციით, ბულგარეთი შესაძლოა უახლოეს მომავალში ასევე წაუყენოს კიევს მოთხოვნები ქვეყანაში მცხოვრები ბულგარული უმცირესობის საგანმანათლებლო უფლებების დასაცავად.