უკრაინამ რუსეთის ფედერაციასთან ტყვეების მორიგი გაცვლის შედეგად 186 მოქალაქე დაიბრუნა. ამის შესახებ ინფორმაციას უკრაინის პრეზიდენტი ვოლოდიმირ ზელენსკი ოფიციალურად ავრცელებს.

პრეზიდენტის განცხადებით, გათავისუფლებულთაგან 185 სამხედრო მოსამსახურეა, ხოლო ერთი პირი სამოქალაქო პირია. დაბრუნებულთა შორის არიან უკრაინის შეიარაღებული ძალების, ეროვნული გვარდიისა და სახელმწიფო საზღვრის დაცვის სამსახურის წარმომადგენლები.

3 ფოტო — დააჭირე გასადიდებლად

სამხედროების ნაწილი რუსეთის ტყვეობაში 2022 წლიდან იმყოფებოდა. ისინი მონაწილეობდნენ ყველაზე მძიმე საბრძოლო მოქმედებებში, მათ შორის მარიუპოლის დაცვასა და „აზოვსტალის“ ოპერაციებში.

გათავისუფლებულები ასევე იბრძოდნენ დონეცკის, ლუჰანსკის, ხარკოვის, ხერსონის, ზაპოროჟიეს, სუმის, კიევის და კურსკის მიმართულებებზე. მათი დაბრუნება უკრაინისთვის მნიშვნელოვან ნაბიჯს წარმოადგენს, რადგან ტყვეობაში მყოფი პირების სახლში დაბრუნება კიევის ერთ-ერთ მთავარ პრიორიტეტად რჩება.

აღსანიშნავია, რომ ტყვეების გაცვლა პერმანენტულ ხასიათს ატარებს, თუმცა თითოეული ასეთი ოპერაცია ხანგრძლივ მოლაპარაკებებს საჭიროებს. უკრაინული მხარე აგრძელებს ძალისხმევას, რათა ყველა ის პირი დაიბრუნოს, ვინც რუსეთის მიერ კონტროლირებად ტერიტორიებზე საპატიმროებში რჩება.