უკრაინის შეიარაღებული ძალების უპილოტო სისტემების დანაყოფებმა რუსეთის მიერ ანექსირებულ ყირიმში, ქალაქ არმიანსკში მდებარე „კრიმსკი ტიტანის“ ქარხანაზე მასშტაბური იერიში განახორციელეს. ოპერაცია 12-13 ივნისის ღამეს ჩატარდა.

უპილოტო სისტემების ძალების მეთაურმა, რობერტ ბროვდიმ ოფიციალურად დაადასტურა, რომ დარტყმები მიზანში მოხვდა. მისი თქმით, ქარხნის ტერიტორიაზე ხანძარი მძვინვარებს, რის გამოც საწარმოო პროცესი სრულად შეჩერებულია.

„ობიექტურმა კონტროლმა აჩვენა, რომ დარტყმები ზუსტი იყო. საწარმო, რომელიც აღმოსავლეთ ევროპაში ტიტანის ორჟანგის უმსხვილეს მწარმოებელს წარმოადგენს, რუსეთის სამხედრო-სამრეწველო კომპლექსის მნიშვნელოვან ნაწილს შეადგენდა“, — აცხადებს ბროვდი.

უკრაინული მხარის ინფორმაციით, „კრიმსკი ტიტანი“ აწარმოებდა საბაზისო ნედლეულს დენთის, რაკეტების საწვავისა და სხვადასხვა ტიპის ასაფეთქებელი მოწყობილობებისთვის. ეს ფაქტი ქარხანას უკრაინისთვის პრიორიტეტულ სამხედრო სამიზნედ აქცევს.

ადგილობრივი სოციალური ქსელების მონაცემებით, ქარხნის მიმართულებით სულ მცირე 23 დარტყმა განხორციელდა. დაზიანებულია საამქროები, ხოლო ტერიტორიიდან პერსონალის ევაკუაცია გახდა საჭირო.

ოკუპაციური ადმინისტრაციის ხელმძღვანელმა, ვასილი ტელიჟენკომ ტელეგრამ-არხზე დაწერა, რომ ადგილზე საგანგებო სიტუაციების მართვის სამსახურები მუშაობენ. მისი მტკიცებით, მავნე ნივთიერებების გაჟონვა დასაშვებ ნორმებს არ აღემატება.

თუმცა, ადგილობრივი მოსახლეობა საპირისპიროს ამტკიცებს. ტელეგრამ-არხ ASTRA-ს ცნობით, არმიანსკის მაცხოვრებლები ჰაერში დამწვრისა და გოგირდის მძაფრ სუნს უჩივიან, რაც სამრეწველო ობიექტის დაზიანების შედეგად ქიმიური ნივთიერებების გამოყოფაზე მიუთითებს.