დროებით ოკუპირებული ქალაქი გორლოვკა, რომელიც დონეცკის ოლქში მდებარეობს, უკრაინის თავდაცვის ძალების საცეცხლე კონტროლის ქვეშ მოექცა. ინფორმაციას ამის შესახებ 28-ე ცალკეული მექანიზირებული ბრიგადა, იგივე „ზამთრის კამპანიის რაინდები“ ავრცელებენ.

ბრიგადის განცხადებით, მათი უპილოტო საფრენი აპარატების ოპერატორები, რომლებიც „სპალაჰის“ სახელით არიან ცნობილი, რუსული საოკუპაციო ძალების ლოგისტიკურ ქსელს უკანა ხაზებზე აქტიურად უტევენ. სამიზნეში ხვდება როგორც სატვირთო ავტომობილები, ისე მსუბუქი ტრანსპორტი და ყველგანმავლები, რომლებსაც მოწინააღმდეგე მომარაგებისთვის იყენებს.

„ყველაფერი, რაც დროებით ოკუპირებულ გორლოვკაში შედის, იქვე იწვება“, — აცხადებენ სამხედროები. მიუხედავად იმისა, რომ ქალაქი უკრაინის პოზიციებიდან დაახლოებით 35–40 კილომეტრის დაშორებით მდებარეობს, იქ გადაადგილება რუსი ოკუპანტებისთვის უკიდურესად სახიფათო გახდა.

3 ფოტო — დააჭირე გასადიდებლად

სამხედროების თქმით, თუ ადრე მტერი ქალაქში შედარებით თავისუფლად გადაადგილდებოდა, ახლა მათი ტრანსპორტი რეგულარულად ხდება დარტყმების სამიზნე. ეს მიღწევა მხოლოდ ტექნიკური აღჭურვილობის, კერძოდ, საშუალო რადიუსის დრონებისა და ოპტიკურ-ბოჭკოვანი სისტემების დამსახურება არ არის.

ბრიგადის შეფასებით, წარმატების მთავარი ფაქტორი პილოტების გამოცდილება, სამოქალაქო შემოწირულობები და უკრაინული დანაყოფების მაღალი დონის კოორდინაციაა. ეს ოპერაცია კიდევ ერთხელ უსვამს ხაზს უპილოტო ტექნოლოგიების მზარდ როლს თანამედროვე ომში, სადაც მცირე ზომის, მაგრამ მაღალტექნოლოგიური საშუალებებით შესაძლებელია დიდი ლოგისტიკური კვანძების პარალიზება.