ბრიტანეთი სექსუალური ექსპლუატაციის მსხვერპლთა კრიმინალიზაციას აგრძელებს

ბრიტანეთში სექსუალური ექსპლუატაციისა და გრუმინგის მსხვერპლი ბავშვები, რომლებსაც წარსულში დანაშაულებრივი ქმედებებისთვის ასამართლებდნენ, დღემდე სისტემური უსამართლობის წინაშე დგანან. ბარონესა ლუიზ ქეისმა, რომელმაც აღნიშნულ საკითხზე მასშტაბური კვლევა ჩაატარა, მთავრობა მკაცრად გააკრიტიკა და არსებულ მექანიზმებს „ზარმაცი არჩევანი“ უწოდა.

მიუხედავად იმისა, რომ ბრიტანეთის მთავრობამ „ბავშვთა პროსტიტუციასთან“ დაკავშირებული ბრალდებების შეწყალების შესახებ კანონი მიიღო, ბარონესა ქეისის განცხადებით, ეს საკმარისი არ არის. მისი თქმით, საჭიროა სრულფასოვანი სქემა, რომელიც არასრულწლოვანების მიმართ გამოტანილ ყველა არასწორ განაჩენს გადახედავს.

BBC-თან საუბარში მსხვერპლები ყვებიან, რომ ათწლეულების წინ ჩადენილი დანაშაულები მათ კვლავ თან სდევს. ერთ-ერთი მათგანი, ჯოანი, 15 წლის ასაკიდან გახდა ექსპლუატაციის მსხვერპლი. მას 500-ზე მეტი მამაკაცი აუპატიურებდა, თუმცა სამართალდამცავებმა ის არა როგორც მსხვერპლი, არამედ როგორც დამნაშავე, ისე განიხილეს.

„მე არ მქონდა მენტალური სიმწიფე იმისთვის, რომ გამეაზრებინა, რა ხდებოდა. ყველამ დამარწმუნა, რომ მე ვიყავი დამნაშავე“, — იხსენებს ჯოანი. 40-ზე მეტი ბრალდება პროსტიტუციის გამო მას დღემდე უზღუდავს დასაქმების, მოგზაურობისა და შვილების სასკოლო აქტივობებში მონაწილეობის შესაძლებლობას.

კიდევ ერთი მსხვერპლი, ფიონა გოდარდი, ყვება, თუ როგორ ხვდებოდა ციხეში ან დაკავების იზოლატორში მას შემდეგ, რაც მოძალადეებისგან გაქცევას ცდილობდა. „ხშირად მათ მართმევდნენ ელექტრონულ სამაჯურს და მაკავებდნენ, როცა თავდაცვას ვცდილობდი“, — ამბობს ის. ფიონას აზრით, ახალი კანონი მხოლოდ მთავრობის შეცდომების მიჩქმალვას ემსახურება.

ჯეიმი ლი ჯოუნსმა, რომელიც 12 წლიდან გახდა გრუმინგის მსხვერპლი, 100-ზე მეტი დაკავება გაიარა. მისი თქმით, როდესაც ბავშვი ალკოჰოლისა და ნარკოტიკების ზემოქმედების ქვეშაა და მას არავინ უსმენს, ეს დანაშაულებრივი ქმედებები რეალურად დახმარების ძახილი იყო.

ბრიტანეთის შინაგან საქმეთა სამინისტროს განცხადებით, დაზარალებულებს შეუძლიათ მიმართონ სისხლის სამართლის საქმეთა გადახედვის კომისიას (CCRC). თუმცა, მსხვერპლთა ნაწილი აცხადებს, რომ კომისია ხშირად უარს ამბობს საქმეების გადახედვაზე, რადგან მაშინდელი კანონმდებლობით მათი მსჯავრდებები ფორმალურად კანონიერი იყო.

ბარონესა ქეისი ხაზს უსვამს, რომ სისტემამ მსხვერპლთა რეაბილიტაციისთვის ბევრად უფრო სწრაფი და ეფექტური ნაბიჯები უნდა გადადგას. მისი თქმით, მხოლოდ პროსტიტუციის მუხლების გაუქმება პრობლემის სრულად მოგვარებას არ უზრუნველყოფს.