საქართველოში მასწავლებლის ეროვნული ჯილდოს რიგით მეათე კონკურსი აქტიურ ფაზაში შევიდა. წელს საკუთარი კანდიდატურა ან ნომინაცია 1200-ზე მეტმა პედაგოგმა წარადგინა. მონაწილეები საქართველოს ყველა რეგიონს მოიცავენ, რაც პროექტის მასშტაბებსა და პედაგოგების მაღალ ინტერესზე მიუთითებს.

3 ფოტო — დააჭირე გასადიდებლად

კონკურსი, რომელიც გლობალური ინიციატივის - „The Global Teacher Prize“-ის ნაწილია, უკვე მრავალი წელია ქვეყანაში საუკეთესო მასწავლებლების წარმოჩენასა და პროფესიის პოპულარიზაციას ემსახურება. ორგანიზატორების განცხადებით, შერჩევის პროცესი სამ ეტაპად მიმდინარეობს.

პირველ ეტაპზე აპლიკაციების ტექნიკური შემოწმება მიმდინარეობს, რის შემდეგაც ჟიური საუკეთესო ათეულს გამოავლენს. შემდგომ ეტაპზე ხუთი ფინალისტი შეირჩევა, ხოლო საბოლოო გამარჯვებული 5 ოქტომბერს, მასწავლებლის მსოფლიო დღეს დასახელდება.

პროექტის მთავარი მხარდამჭერი საქართველოს ბანკია. ფინანსური ინსტიტუტი უკვე ექვს წელზე მეტია, განათლებას საკუთარი კორპორატიული სოციალური პასუხისმგებლობის (CSR) ერთ-ერთ მთავარ პრიორიტეტად მიიჩნევს. ბანკის მხარდაჭერით 40-ზე მეტი საგანმანათლებლო ინიციატივა ხორციელდება, რომელიც 500 000-ზე მეტ მოსწავლეს, სტუდენტსა და ახალგაზრდა პროფესიონალს აერთიანებს.

საქართველოს ბანკის პორტფელი განათლების მიმართულებით მოიცავს ისეთ პროექტებს, როგორებიცაა:

  • საქართველოს ბანკის სტიპენდიები და საზღვარგარეთ სწავლის სრული დაფინანსება;
  • „იდეათეკების“ პროექტი - სასკოლო ბიბლიოთეკების განახლება;
  • STEM სკოლა და STEM ოლიმპიადა;
  • ეკონომიკისა და ფინანსური განათლების ოლიმპიადები.

წლევანდელი კონკურსის მხარდამჭერთა სიაში ასევე შედიან გუდავაძე-პატარკაციშვილის ფონდი, როგორც გენერალური სპონსორი, ილიას სახელმწიფო უნივერსიტეტი, ალტე უნივერსიტეტი და კონსულტაციისა და ტრენინგის ცენტრი. დაინტერესებულ პირებს დეტალური ინფორმაციის მიღება განათლების მხარდამჭერ პლატფორმაზე - ganatleba.bog.ge შეუძლიათ.