დასავლეთ ევროპა ზაფხულის პირველივე დღეებში ანომალიურმა სიცხემ მოიცვა. პორტუგალიაში, ქალაქ მორაში, თერმომეტრმა 40.3 გრადუსი აჩვენა, რაც ქვეყნის ისტორიაში მაისის თვის ყველაზე მაღალი მაჩვენებელია. წინა რეკორდი, რომელიც 2001 წელს დაფიქსირდა, 40 გრადუსს შეადგენდა.

„სითბური გუმბათის“ ეფექტი

მეტეოროლოგები არსებულ ვითარებას „სითბურ გუმბათს“ უკავშირებენ. მაღალი წნევის ეს არეალი ჰაერის მასებს ერთ ადგილას აკავებს და ტემპერატურის მკვეთრ ზრდას იწვევს. პროცესი განსაკუთრებით მწვავედ საფრანგეთში, იტალიაში, გერმანიასა და ესპანეთში მიმდინარეობს.

საფრანგეთის პრემიერ-მინისტრმა სებასტიან ლეკორნუმ უკვე გამართა სამთავრობო შეხვედრა, სადაც მთავარი განსახილველი საკითხი ტყის ხანძრების პრევენცია და წყლის რესურსების მართვა იყო. ქვეყნის 17 დეპარტამენტში, მათ შორის პარიზში, „ნარინჯისფერი“ განგაშია გამოცხადებული.

სკოლები და საგამოცდო პროცესი

საფრანგეთში სიცხემ საგანმანათლებლო პროცესზეც მოახდინა გავლენა. ერთ-ერთმა სკოლამ ლანდის რეგიონში სწავლა შეწყვიტა, მას შემდეგ, რაც შენობაში ტემპერატურამ 53 გრადუსს მიაღწია. მიუხედავად ამისა, განათლების სამინისტრომ გადაწყვიტა, რომ ბაკალავრიატის გამოცდები გრაფიკის მიხედვით გაგრძელდეს.

მასწავლებელთა პროფკავშირები აცხადებენ, რომ საგამოცდო ცენტრებში პირობები აუტანელია. მათი მონაცემებით, სკოლების 78%-ში კლასებში ტემპერატურა 30 გრადუსს აღემატება, რაც სასწავლო პროცესს ფიზიკურად შეუძლებელს ხდის.

სპორტი და ჯანმრთელობის რისკები

სიცხის გავლენა სპორტულ ღონისძიებებზეც აისახა. პარიზში მიმდინარე „როლან გაროსის“ ტურნირზე იტალიელმა ჩოგბურთელმა იანიკ სინერმა თავბრუსხვევისა და სისუსტის გამო თამაში ვერ გააგრძელა. თუმცა, სპორტსმენმა აღნიშნა, რომ მიზეზი მხოლოდ ამინდი არ ყოფილა.

იტალიის ხელისუფლებამ რომის, ფლორენციის, ბოლონიის, ბრეშიასა და ტურინისთვის „წითელი“ დონის გაფრთხილება გამოსცა. ეს ნიშნავს, რომ სიცხემ შესაძლოა ჯანმრთელობის სერიოზული პრობლემები შეუქმნას ჯანმრთელ და აქტიურ ადამიანებსაც კი.

კლიმატის ცვლილების ევროპული სამსახურის, Copernicus-ის მონაცემებით, ბოლო 30 წლის განმავლობაში ევროპა ყოველ ათწლეულში საშუალოდ 0.56 გრადუსით თბება.

გაეროს გაფრთხილებით, გლობალური ტემპერატურა მომდევნო წლებშიც რეკორდულ მაჩვენებლებთან ახლოს დარჩება. ისტორიაში დაფიქსირებული 11 ყველაზე ცხელი წელი სწორედ 2015 წლის შემდეგ პერიოდზე მოდის.