ბრიტანული ორგანიზაცია Citizen Zoo ახალ ინიციატივას იწყებს, რომელიც ადგილობრივ მოსახლეობას ჭაობის კალიების (Bog bush cricket) გადარჩენაში ჩართვისკენ მოუწოდებს. პროექტის ფარგლებში, მოხალისეები მწერების შინ გამოყვანას შეძლებენ, რაც მათი პოპულაციის აღდგენას შეუწყობს ხელს.

ჭაობის კალია, რომელიც დიდ ბრიტანეთში გავრცელებულ 10 სახეობის კალიას შორისაა, ამჟამად მხოლოდ ნორფოლკის რამდენიმე ლოკაციაზე გვხვდება. მწერი დაახლოებით 18 მილიმეტრია და უპირატესობას დაბლობ ჭაობიან ადგილებს ანიჭებს.

ენტომოლოგ სტიუარტ გრინის თქმით, ამ სახეობის გავრცელება შეზღუდულია, რადგან მათ აქვთ მოკლე ფრთები და ფრენა არ შეუძლიათ. შესაბამისად, ახალი ტერიტორიების ათვისება მათთვის ბუნებრივად რთულია, რაც ადამიანის ჩარევას საჭიროებს.

Citizen Zoo-ს გეგმაში შედის სამეცნიერო მოდელის შექმნა, რომელიც ტყვეობაში მწერების გამოყვანის ეფექტურ გზას განსაზღვრავს. ეს მეთოდი უკვე გამოიცადა დიდი ჭაობის კალიების (Large marsh grasshopper) შემთხვევაში, სადაც 2018 წლიდან მოყოლებული 8 000-ზე მეტი ინდივიდის რეინტროდუქცია მოხერხდა.

გამოწვევები და მოლოდინები

მიუხედავად წარმატებული გამოცდილებისა, ექსპერტები აფრთხილებენ მოხალისეებს, რომ ჭაობის კალიებთან მუშაობა უფრო რთული იქნება. სტიუარტ გრინი განმარტავს, რომ ეს მწერები ხასიათდებიან კანნიბალიზმით და გააჩნიათ ორწლიანი სასიცოცხლო ციკლი, რაც მოშენების პროცესს აბსოლუტურად განსხვავებულ მიდგომას საჭიროებს.

ორგანიზაციის წარმომადგენელი ელიოტ ნიუტონი აღნიშნავს, რომ ეს პროექტი ადამიანებს საშუალებას აძლევს, ეკოლოგიური კრიზისის ფონზე უძლურების განცდა დაძლიონ. მისი თქმით, თითოეულ მოქალაქეს შეუძლია პირდაპირი მონაწილეობა მიიღოს ბუნების აღდგენასა და ველური მომავლის ფორმირებაში.

Pamela Abbott

ამჟამად გრძელდება შესაფერისი ჰაბიტატების შერჩევა, სადაც გამოყვანილი კალიების გაშვება მოხდება. ერთ-ერთ პოტენციურ ადგილად ფენსის (The Fens) ტერიტორია განიხილება.