ბრაზილიის ეროვნული ნაკრების მთავარი მწვრთნელი კარლო ანჩელოტი ნეიმარის ჯანმრთელობის მდგომარეობასთან დაკავშირებით გავრცელებულ კითხვებს პასუხობს. გამოცდილი სპეციალისტის თქმით, მიუხედავად არსებული სირთულეებისა, სამწვრთნელო შტაბი ფეხბურთელის მალე დაბრუნებას ელოდება.

„შემადგენლობის გამოცხადებამდე „სანტოსმა“ შეგვატყობინა, რომ ნეიმარს მცირე პრობლემა ჰქონდა. ჩვენ მათ საშუალება მივეცით, 27 მაისამდე ეზრუნათ მის მკურნალობაზე, რის შემდეგაც პასუხისმგებლობა სრულად ნაკრებმა აიღო“, – აცხადებს ანჩელოტი.

რა მდგომარეობაშია ნეიმარი?

ბრაზილიის ნაკრების ექიმმა, როდრიგო ლასმარმა ჩატარებული კვლევების შედეგები უკვე გაასაჯაროვა. დადგინდა, რომ შემტევს მარჯვენა ფეხის წვივის კუნთის მეორე ხარისხის გაწყვეტა აღენიშნება. ეს დიაგნოზი ნაკრებისთვის სერიოზული გამოწვევაა.

თუმცა, ანჩელოტი ოპტიმისტურადაა განწყობილი: „ნეიმარი თავს კარგად გრძნობს და ვფიქრობთ, პირველი მატჩისთვის მწყობრში იქნება. ყველაზე პესიმისტური სცენარით, ის ჯგუფური ეტაპის მეორე შეხვედრას გამოტოვებს, მაგრამ მზად იქნება“. მწვრთნელმა აღნიშნა, რომ ფეხბურთელს კარგად ესმის თავისი როლი და პასუხისმგებლობა მოახლოებულ მუნდიალზე.

ანჩელოტის პასუხი კრიტიკოსებს

ჟურნალისტების კითხვას, გამოიძახებდა თუ არა ნეიმარს ნაკრებში, თუკი მის რეალურ მდგომარეობას წინასწარ უფრო დეტალურად გაეცნობოდა, ანჩელოტიმ იტალიური იუმორით უპასუხა: „იტალიაში ამბობენ - ბაბუაჩემს რომ ბორბლები ჰქონოდა, მანქანა იქნებოდაო“.

შეგახსენებთ, რომ ბრაზილიის ნაკრები მსოფლიო ჩემპიონატის C ჯგუფში იმყოფება. მათი მეტოქეები მაროკოს, შოტლანდიისა და ჰაიტის ეროვნული გუნდები იქნებიან. გულშემატკივრები მოუთმენლად ელიან, შეძლებს თუ არა ნეიმარი ტურნირზე სრული დატვირთვით თამაშს.