UFC-ის ლეგენდარული მებრძოლი და ამჟამინდელი კომენტატორი, დენიელ კორმიე, ვაშინგტონში დაგეგმილ ისტორიულ საჩემპიონო ბრძოლებს აფასებს. კორმიეს თქმით, თეთრი სახლის ტერიტორიაზე გასამართი დაპირისპირებები ორგანიზაციისთვის უპრეცედენტო მასშტაბისაა.

კორმიემ ყურადღება გაამახვილა ილია თოფურიას ემოციურ მდგომარეობაზე. მისი თქმით, ქართველი მებრძოლის გაბრაზება პრესკონფერენციაზე ბრძოლის წინ საჭირო დრამატულ ეფექტს ქმნის.

„ეს აუცილებლად უნდა ვნახო“

„ყოველთვის მომწონს, როცა ბრძოლას თრეშ-თოქი ახლავს თან. განსაკუთრებით მაშინ, როცა საქმე საჩემპიონო დაპირისპირებას ეხება და ფონი ისეთი მასშტაბურია, როგორიც თეთრი სახლია“, — აცხადებს კორმიე. მისი თქმით, მსგავსი მოვლენები რიგით გულშემატკივრებში ინტერესს მაქსიმალურად აღვივებს.

კორმიემ აღნიშნა, რომ თეთრი სახლის ლოკაცია სპორტისთვის ახალი აუდიტორიის მოზიდვას შეუწყობს ხელს. „მესმის, რომ ეს ადგილი ბევრ ისეთ ადამიანს მოიზიდავს, ვინც აქამდე ჩვენს სპორტს არ უყურებდა. ახლა, როცა ვხედავ, რომ ადრინდელივით დიდი თავაზიანობა აღარ იგრძნობა, ეს მომწონს“, — დასძინა მან.

თოფურიას რეაქცია პრესკონფერენციაზე

კორმიეს განსაკუთრებით დაამახსოვრდა ილია თოფურიას რეაქცია პრესკონფერენციის დროს. „მომეწონა, როცა დავინახე, როგორ გაბრაზდა ილია თოფურია ჯოშ ჰოკიტის ქმედებებზე, რომელიც ალექს პერეირას ესხმოდა თავს. მომეწონა ის პრესკონფერენცია, რადგან ამ ყველაფრის დიდი გულშემატკივარი ვარ“, — აღნიშნა ყოფილმა ჩემპიონმა.

შეგახსენებთ, რომ ილია თოფურიასა და ჯასტინ გეიჯის დაპირისპირება 14 ივნისს გაიმართება. საქართველოს დროით, ქართველი გულშემატკივრები ამ ბრძოლას 15 ივნისის დილას იხილავენ. თოფურია უკვე ვაშინგტონში იმყოფება და მოსამზადებელ ეტაპს უშუალოდ ჩხუბის ადგილზე გადის.