ჩემპიონთა ლიგის ფინალი, რომელიც ბუდაპეშტის „პუშკაშ არენაზე“ გაიმართა, ლონდონის „არსენალისთვის“ მტკივნეული გამოდგა. მიკელ არტეტას შეგირდები პარიზულ გრანდთან, „პარი სენ-ჟერმენთან“ პენალტების სერიაში დამარცხდნენ. მატჩის ძირითადი და დამატებითი დრო ფრედ, 1:1 დასრულდა, „პსჟ“-მ კი ტიტული ზედიზედ მეორედ მოიპოვა.

მხარდაჭერა თანაგუნდელებს

ლონდონელთა ნახევარმცველმა დეკლან რაისმა, რომელიც შეხვედრის ერთ-ერთი გამორჩეული ფიგურა იყო, მატჩის შემდეგ TNT-სთან ემოციური კომენტარი გააკეთა. მან განსაკუთრებული ყურადღება გაამახვილა გაბრიელსა და ეზეზე, რომლებმაც გადამწყვეტ მომენტებში პენალტები ვერ გამოიყენეს.

„ჩვენ ისინი გვიყვარს და მათ გვერდით ვართ. ფეხბურთში ასეთი რამეები ხდება. ისინი არ იქნებიან ბოლო ფეხბურთელები, რომლებიც ფინალში პენალტს გააფუჭებენ“, - განაცხადა რაისმა.

ინგლისელი ნახევარმცველის თქმით, სწორედ ამ მოთამაშეების დამსახურებაა, რომ „არსენალმა“ მიმდინარე სეზონში პრემიერ ლიგის ტიტულის მოპოვება შეძლო. რაისმა აღნიშნა, რომ გაბრიელის წვლილი გუნდის წარმატებაში ფასდაუდებელია, ხოლო ეზემ სეზონის განმავლობაში არაერთი გადამწყვეტი გოლი გაიტანა.

„ეს ლატარიაა“

რაისმა ფინალის დასრულების შემდეგ გუნდის საერთო განწყობაზეც ისაუბრა. მისი თქმით, პენალტების სერია ხშირად იღბალზეა დამოკიდებული, თუმცა გუნდი ამ მარცხით არ გატეხილა.

„ეს ლატარიაა. ისტორიაში საუკეთესო გუნდებსაც წაუგიათ ფინალები პენალტების სერიაში და ახლა ეს ჩვენ დაგვემართა. ერთად ვიგებთ და ერთად ვაგებთ. ამ ბიჭებით ძალიან ვამაყობ“, - აღნიშნა რაისმა.

ფეხბურთელმა ასევე გაიხსენა გასული ივლისი და აღნიშნა, რომ გუნდმა სეზონის განმავლობაში უზარმაზარი პროგრესი განიცადა. მიუხედავად იმისა, რომ ფინალში მარცხი მძიმე გადასატანია, რაისი დარწმუნებულია, რომ „არსენალი“ მომავალში უფრო ძლიერი დაბრუნდება.