ილია თოფურიას კარიერაში პირველი მარცხი MMA-ს სამყაროსთვის მოულოდნელი აღმოჩნდა. „ელ მატადორის“ წაგებას, რომელსაც აქამდე 17 მოგება ჰქონდა, არაერთი ცნობილი სპორტსმენი გამოეხმაურა.

განსაკუთრებული ყურადღება დაიმსახურა კრივის ვარსკვლავების, ტერენს კროუფორდისა და ჯეიკ პოლის რეაქციამ. მათ თოფურიასთან დაპირისპირების სურვილი წარსულში თავად გამოთქვეს, რაზეც ქართველმა მებრძოლმა უპასუხა, რომ მათ მის წინააღმდეგ შანსი არ ჰქონდათ.

კროუფორდისა და პოლის კრიტიკა

ტერენს კროუფორდმა სოციალურ ქსელში ირონიული პოსტი გამოაქვეყნა და თოფურიას წარსული განცხადებები შეახსენა. „ეს ის ბიჭი არაა, რომელმაც თქვა, რომ დამანოკაუტებდა და მე და შაკურ სტივენსონს ერთდროულად გვცემდა?“ — დაწერა კროუფორდმა.

უფრო აგრესიული იყო ჯეიკ პოლის პოზიცია. მან თოფურია მწვავედ გააკრიტიკა და ბრძოლის შეწყვეტის გამო „სუსტი“ უწოდა. პოლმა აღნიშნა, რომ თოფურია სპარინგის ღირსიც არ არის და მხარი ჯასტინ გეიჯის დაუჭირა.

ცარუკიანის ლაკონიური შეფასება

მებრძოლების გამოხმაურებებს არმან ცარუკიანიც შეუერთდა. სომეხმა მებრძოლმა სოციალურ ქსელში ირონიული პოსტი გამოაქვეყნა: „ილია „მეტი აღარ“ თოფურია“.

შეგახსენებთ, რომ ამ მარცხით ჯასტინ გეიჯი მსუბუქი წონის აბსოლუტური ჩემპიონი გახდა. თოფურიასთვის ეს კარიერაში პირველი შემთხვევაა, როდესაც ოქტაგონი დამარცხებულმა დატოვა.