ამერიკელი ალტერნატიული პოპ-მუსიკოსი და ინტერნეტ-სენსაცია ოლივერ ტრი ბრაზილიაში მომხდარ ავიაკატასტროფას ემსხვერპლა. 32 წლის არტისტი იმ ექვს ადამიანს შორის იყო, რომლებიც რიო-დე-ჟანეიროს თავზე ორი ვერტმფრენის შეჯახების შედეგად დაიღუპნენ.

ტრაგედია კვირას მოხდა. ერთ-ერთი ვერტმფრენი შეჯახების შემდეგ ავტომობილების დილერის ავტოსადგომზე ჩამოვარდა, რამაც დაახლოებით 20 ავტომობილის აალება გამოიწვია. ადგილობრივი მედიის მიერ გავრცელებულ კადრებში ჩანს, თუ როგორ ვარდება საჰაერო ხომალდი და როგორ იფარება კატასტროფის ადგილი ცეცხლითა და კვამლით.

ვინ იმყოფებოდა ბორტზე?

Associated Press-ის ცნობით, გარდაცვლილთა შორის არგენტინელი კონტენტი-კრეატორი გასპარ პრიმ დიასი, იგივე „გასპიც“ იყო. ბორტზე ასევე იმყოფებოდნენ ლუკას ბრიტო ჩავესი, ლუკას ვინიალი და პილოტი ალექსანდრე სოუზა. მეორე ვერტმფრენის ეკიპაჟის მანიფესტში მხოლოდ პილოტი, ჩარლზ მარსილაკი ფიქსირდება.

რიო-დე-ჟანეიროს შტატის სამხედრო სახანძრო დეპარტამენტის განცხადებით, მათ შეტყობინება ადგილობრივი დროით დილის 09:00 საათზე მიიღეს. ამჟამად სამართალდამცავები კატასტროფის გამომწვევ მიზეზებს იკვლევენ.

მუსიკალური კარიერა და ხსოვნა

ოლივერ ტრი, ნამდვილი სახელით ოლივერ ტრი ნიკელი, 1993 წელს კალიფორნიაში დაიბადა. მან სახელი 2016 წელს სოციალურ ქსელებში გავრცელებული ვირუსული ვიდეოებით გაითქვა. მუსიკოსი ცნობილი იყო ისეთი ჰიტებით, როგორებიცაა Life Goes On, Miss You და Alien Boy.

ტრაგედიამდე მუსიკოსი მსოფლიო ტურნეში იმყოფებოდა. მისი ბოლო კონცერტი 6 ივნისს სან-პაულოში ჩატარდა. წინგეგმილი ჰქონდა კონცერტები ლისაბონში, გლაზგოში, მანჩესტერსა და ლონდონში.

„არ მჯერა, რომ ამას ვწერ. შენ მხოლოდ 32 წლის იყავი. ჯერ კიდევ ამდენი რამ უნდა გაგეკეთებინა, ამდენი მუსიკა და კონტენტი შეგექმნა. შენ ლეგენდა ხარ და ლეგენდად დარჩები“, - წერს სოციალურ ქსელ X-ში ცნობილი იუთუბერი KSI, რომელთანაც ტრიმ ერთობლივი ტრეკი ჩაწერა.

მუსიკოსს პატივი მიაგო Jackass-ის ვარსკვლავმა სტივ-ომაც, რომელმაც მას „ახლო მეგობარი“ უწოდა. 2024 წელს ოლივერ ტრი Brit Award-ის ნომინანტიც იყო სიმღერისთვის Miss You.