ესპანური ფეხბურთის ერთ-ერთმა ყველაზე პერსპექტიულმა ტალანტმა, ხესუს როდრიგესმა, გამოცემა AS-თან ინტერვიუში თანამედროვე ფეხბურთის გამორჩეულ მოთამაშეებზე ისაუბრა. 20 წლის შემტევმა, რომელიც ამჟამად იტალიური „კომოს“ ღირსებას იცავს, ხვიჩა კვარაცხელია განსაკუთრებული შეფასებით გამოარჩია.

„ის უბრალოდ ფენომენია“

როდრიგესის თქმით, ქართველი ფეხბურთელი მისთვის განსაკუთრებული დაკვირვების ობიექტია. ესპანელი მოთამაშე ხაზს უსვამს იმ ფაქტს, რომ ორივე მათგანი მემარჯვენე გარემარბია, რაც მის ინტერესს კიდევ უფრო ამძაფრებს.

„იმ ფეხბურთელებისგან, ვისაც ნაკლებად ვიცნობდი, კვარაცხელიამ ძალიან დიდი შთაბეჭდილება მოახდინა. რადგან ჩემსავით მემარჯვენეა, საკმაოდ ბევრს ვაკვირდებოდი და ის უბრალოდ ფენომენია“, — აცხადებს როდრიგესი.

დაუვიწყარი მატჩი პარიზში

ესპანელმა ფეხბურთელმა განსაკუთრებით გამოყო კვარაცხელიას გამოსვლა მიუნხენის „ბაიერნის“ წინააღმდეგ, რომელიც პარიზში გაიმართა. მისთვის ეს შეხვედრა დაუვიწყარი აღმოჩნდა.

როდრიგესის აზრით, კვარაცხელია და ოლისე ამჟამად მსოფლიოს ორ საუკეთესო გარემარბად მიიჩნევიან, რა თქმა უნდა, ლამინ იამალის შემდეგ, რომელსაც ის პირველ ნომრად ასახელებს.

იამალი, როგორც სტანდარტი

საუბრისას როდრიგესმა ლამინ იამალზეც ისაუბრა. მისი თქმით, იამალი არა მხოლოდ საუკეთესო გარემარბი, არამედ ზოგადად გამორჩეული ფეხბურთელია, რომელიც თავის ასაკში უკვე გადამწყვეტ როლს თამაშობს.

„ის გამორჩეულია და აქვს ქუჩის სტილის თამაში, რაც ძალიან მომწონს. მისი ჩვენს გუნდში ყოფნა ნამდვილი ფუფუნებაა“, — აღნიშნა „კომოს“ ფეხბურთელმა.

შეგახსენებთ, რომ ხესუს როდრიგესს ესპანეთის ნაკრებში დებიუტი მიმდინარე წლის 4 ივნისს, კატარის წინააღმდეგ ჰქონდა. მიუხედავად იმისა, რომ ის ლუის დე ლა ფუენტეს გაფართოებულ სიაში იყო, საბოლოო 26-კაციან განაცხადში ვერ მოხვდა.