ქართული საკლუბო რაგბის მთავარი დასაყრდენი, „შავი ლომი“, ახალ სეზონს მნიშვნელოვანი გაძლიერებით ხვდება. მსოფლიო რაგბის ახალი სანაკრებო კალენდრის ფონზე, როდესაც „ბორჯღალოსნებს“ პირველი დონის ნაკრებებთან სათამაშო დრო შეუმცირდებათ, ფრენჩაიზის სტაბილურობა და მაღალი დონე კრიტიკულად მნიშვნელოვანი ხდება.

გუნდმა ოფიციალურად დაადასტურა ორი გამოცდილი მორაგბის ტრანსფერი, რომლებიც გასულ პერიოდში საფრანგეთში ასპარეზობდნენ. ეს გადაწყვეტილება კლუბის სტრატეგიის ნაწილია, რომელიც ევროპის ჩელენჯ თასზე წარმატებულ ასპარეზობას ისახავს მიზნად.

პირველი ახალწვეული საქართველოს ეროვნული ნაკრების შეუცვლელი წევრი, გიორგი კვესელაძეა. 26 წლის მორაგბემ გასული სეზონი საფრანგეთის PRO D2-ში, „გრენობლის“ შემადგენლობაში გაატარა. 185 სანტიმეტრი სიმაღლის ცენტრმა 17 შეხვედრაში მიიღო მონაწილეობა, საიდანაც 10-ჯერ სასტარტო შემადგენლობაში იყო. მან მოედანზე გატარებულ 972 წუთში თავი 2 ლელოთი გამოიჩინა.

გუნდს ასევე შეუერთდა ვახტანგ ჯინჭარაძე. 26 წლის მორაგბე, რომელიც 187 სანტიმეტრს აღწევს, გასულ სეზონში „მონტობანის“ ღირსებას იცავდა. „მონტობანის“ რიგებში მან 7 შეხვედრაში მიიღო მონაწილეობა, აქედან 2-ჯერ ძირითადში დაიწყო მატჩი და 286 წუთში ერთი ლელოს გატანა მოახერხა.

შეგახსენებთ, რომ „შავი ლომი“ აქტიურ სათამაშო რეჟიმშია. კლუბი ცოტა ხნის წინ სამხრეთ აფრიკულ ტურნეზე იმყოფებოდა, სადაც „ტოიოტა ჩელენჯის“ ფარგლებში სამი დაპირისპირება გამართა. გუნდმა ერთი გამარჯვების მოპოვება შეძლო, ორ მატჩში კი მეტოქეებთან დამარცხდა.

საფრანგეთიდან დაბრუნებული მორაგბეების დამატება „შავი ლომისთვის“ ახალი ეტაპია. კლუბი აგრძელებს ქართველი მორაგბეების თავმოყრას და მათთვის პროფესიული გარემოს შექმნას, რაც გრძელვადიან პერსპექტივაში ქართული რაგბის საერთაშორისო რეპუტაციას ამყარებს.