ფრანგული გამოცემა Footmercato-ს ინფორმაციით, პარი სენ-ჟერმენი შემადგენლობის მასშტაბურ გაძლიერებას გეგმავს. ლუიშ კამპუშის სტრატეგია ახალ სეზონში ცენტრალური და მარცხენა მცველების, ნახევარმცველისა და გარემარბის დამატებას ითვალისწინებს.

პარიზელთა სამიზნეში პრემიერლიგიდან გავარდნილი „ვესტ ჰემის“ ორი ლიდერი, კრისენსიო სამერვილი და მატეუშ ფერნანდეში მოექცნენ. ლონდონური კლუბი, რომელიც ფინანსური სტაბილურობის შესანარჩუნებლად აქტივების რეალიზებას ცდილობს, ფეხბურთელების სანაცვლოდ ჯამში 130 მილიონ ევროს ითხოვს.

ვინ არის სამერვილი?

24 წლის ნიდერლანდელი გარემარბი კრისენსიო სამერვილი „ვესტ ჰემის“ იმ მცირერიცხოვან ფეხბურთელთა შორისაა, რომელმაც გასულ სეზონში გულშემატკივრების სიმპათია დაიმსახურა. მან 31 მატჩში 5 გოლი გაიტანა და 4 საგოლე გადაცემა შეასრულა.

სამერვილს საფეხბურთო სამყარო ხვიჩა კვარაცხელიას პოტენციურ კონკურენტად განიხილავს. მისი პროგრესი იმდენად თვალშისაცემი იყო, რომ მან ნიდერლანდების ეროვნულ ნაკრებშიც დაიმკვიდრა ადგილი და ამჟამად მუნდიალზე ასპარეზობს. ლონდონელები მის სანაცვლოდ 50 მილიონ ევროს ითხოვენ.

მატეუშ ფერნანდეშის პერსპექტივა

21 წლის პორტუგალიელი ნახევარმცველი მატეუშ ფერნანდეში „ჩაქუჩების“ ისტორიაში ერთ-ერთი ყველაზე ძვირადღირებული ტრანსფერია. გასულ ზაფხულს ვესტ ჰემმა მასში 40 მილიონ ფუნტზე მეტი გადაიხადა.

მიუხედავად გუნდის წარუმატებელი სეზონისა, ფერნანდეშმა 38 მატჩში 4 გოლი და 4 საგოლე გადაცემა მიითვალა. „ვესტ ჰემი“ მის სანაცვლოდ 80 მილიონ ევროს ითხოვს, თუმცა კლუბის ჩემპიონშიფში დაქვეითება პარიზელებს მოლაპარაკებებში უპირატესობას ანიჭებს.

პსჟ-ს მნიშვნელოვანი კოზირი აქვს მომავალ მოლაპარაკებებში. ჩემპიონთა ლიგის ორგზის გამარჯვებულმა მტკიცედ გადაწყვიტა, ისარგებლოს ლონდონელთა ფინანსური პრობლემებით.

Footmercato-ს ცნობით, „ვესტ ჰემს“ სახელფასო ფონდის შესამცირებლად საუკეთესო აქტივების გაყიდვა აუცილებლად მოუწევს. ეს კი პსჟ-ს საშუალებას მისცემს, სასურველი სამიზნეები უფრო მარტივად დაიმატოს.