გლობალური საფონდო ბაზრები ზრდის ტენდენციას აჩვენებს მას შემდეგ, რაც აშშ-ის პრეზიდენტმა დონალდ ტრამპმა ირანზე დაგეგმილი თავდასხმების გაუქმების შესახებ განაცხადა. პრეზიდენტის თქმით, თეირანთან სამშვიდობო შეთანხმება უკვე ახლოა.

ამერიკულმა ბაზრებმა მკვეთრი რეაგირება მოახდინა. Wall Street-ის ინდექსმა S&P 500-მა ვაჭრობა 1.8 პროცენტიანი ზრდით დაასრულა, რაც აპრილის შემდეგ ყველაზე მასშტაბური დღიური მონაცემია. ამით საფონდო ბირჟებზე სამდღიანი ვარდნის ტენდენცია შეწყდა.

ტექნოლოგიურ სექტორზე ორიენტირებული Nasdaq Composite 2.5 პროცენტით დაწინაურდა, ხოლო Dow Jones-მა დაახლოებით 1.9 პროცენტიანი მოგება დააფიქსირა. პოზიტიური განწყობა აზიისა და წყნარი ოკეანის რეგიონშიც გაგრძელდა.

აზიური ბაზრების რეაქცია

იაპონიის, სამხრეთ კორეის, ტაივანის, ჰონგ-კონგისა და ავსტრალიის ბირჟებზე მნიშვნელოვანი ზრდა დაფიქსირდა. სამხრეთ კორეის KOSPI-მ, რომელიც მიმდინარე წელს ერთ-ერთ საუკეთესო მაჩვენებელს აჩვენებს, დილის ვაჭრობაში 8 პროცენტზე მეტით მოიმატა. იაპონური Nikkei 225 კი 4 პროცენტით გაიზარდა.

ანალიტიკოსები აღნიშნავენ, რომ ეს ზრდა გეოპოლიტიკური რისკების მნიშვნელოვან შემცირებას უკავშირდება. თუმცა, ბაზრის სტაბილურობისთვის ინვესტორები დოკუმენტის რეალურ ხელმოწერას და ჰორმუზის სრუტის სრულად გახსნას ელოდებიან.

ნავთობის ფასების ცვლილება

ნავთობის საერთაშორისო ფასები, კერძოდ Brent-ის მარკის ნავთობის ღირებულება, დაახლოებით 1 პროცენტით დაეცა და ბარელზე 89.50 დოლარს ჩამოსცდა. მიზეზი ჰორმუზის სრუტეში ვითარების ნორმალიზების მოლოდინია, რადგან აღნიშნული მარშრუტი გლობალური ენერგომომარაგების მეხუთედს ატარებს.

დონალდ ტრამპის განცხადებით, ირანთან „დიდი შეთანხმება“ შესაძლოა მიმდინარე კვირის ბოლოს გაფორმდეს. მიუხედავად იმისა, რომ ირანის მხარეს ოფიციალურად არ დაუდასტურებია შეთანხმების დეტალები, საგარეო საქმეთა სამინისტროს სპიკერმა აღნიშნა, რომ აშშ-თან ურთიერთგაგების მემორანდუმი „განხილვის პროცესშია“.

ექსპერტების შეფასებით, მიმდინარე მოვლენები ბაზრის სტრუქტურულ რღვევას კი არ წარმოადგენს, არამედ გეოპოლიტიკური დაძაბულობის ფონზე დაფიქსირებულ ჯანსაღ კორექციას, რაც ბაზრის გრძელვადიან პერსპექტივას აუმჯობესებს.