ლეგენდარული შვედი ფორვარდი ზლატან იბრაჰიმოვიჩი, რომელმაც „ლოს ანჯელეს გალაქსის“ რიგებში 58 მატჩში 53 გოლი გაიტანა, ამერიკული და ევროპული ფეხბურთის სრულიად განსხვავებულ რეალობაზე საუბრობს. ჯიმი კიმელის შოუში სტუმრობისას, იბრამ ღიად დაახასიათა გულშემატკივართა ქცევა ორივე კონტინენტზე.

„რბილი“ ამერიკელი გულშემატკივრები

იბრაჰიმოვიჩის თქმით, აშშ-ში ფეხბურთისადმი დამოკიდებულება გაცილებით ნაკლებად აგრესიულია. მან გაიხსენა, თუ როგორ ხვდებოდნენ მას „გალაქსის“ გულშემატკივრები წაგებული მატჩების შემდეგ.

„მახსოვს, სტადიონიდან გასვლისას ვხედავდი ქომაგებს, რომლებიც იცინოდნენ და ტაკოს ჭამდნენ. ისინი უბრალოდ მანქანასთან გელოდებოდნენ. ეს არის სირბილე. ევროპაში თუ აგებ, გულშემატკივრები სახლთან გელოდებიან და ხელში ტაკო ნამდვილად არ უჭირავთ,“ - აღნიშნა ზლატანმა.

საფრანგეთის „ცხელი“ სტადიონები

სრულიად საპირისპირო გამოცდილება ჰქონდა შვედს პარი სენ-ჟერმენში თამაშისას. ის იხსენებს მარსელში გამართულ მატჩს, სადაც სიტუაცია სიცოცხლისთვის საშიშიც კი იყო.

„მარსელში გასვლით მატჩზე მოედანზე დანებს გვესროდნენ. გოლი გავიტანეთ და კუთხურის ალმისკენ წავედით აღსანიშნავად, რა დროსაც დანა დავინახე. მაშინვე ვუთხარი თანაგუნდელებს, რომ მომდევნო გოლებს მოედნის ცენტრში აღვნიშნავდით. იქიდან ცოცხალი გამოსვლა მინდოდა,“ - იხსენებს იბრაჰიმოვიჩი.

რატომ არის განსხვავება ასეთი დიდი?

იბრაჰიმოვიჩის აზრით, განსხვავება დიდწილად ჩემპიონატის ფორმატშია. MLS-ში ფლეი-ოფის სისტემა რეგულარული სეზონის მარცხებს აუფასურებს, რაც გულშემატკივარს ნაკლებად „სტრესულს“ ხდის.

ევროპულ ტოპ ლიგებში კი წნეხი მუდმივია. შვედი ვარსკვლავის თქმით, ევროპაში გუნდის არასახარბიელო თამაშიდან 5 წუთში მთელი სტადიონი სტვენას იწყებს, რაც მოთამაშეებზე პირდაპირ ფსიქოლოგიურ ზეწოლას ახდენს.