ამერიკის ფედერალურმა საგამოძიებო ბიურომ (FBI) ალაბამას შტატში, ჰანტსვილის კამპუსში, უნიკალური სასწავლო სივრცე შექმნა. 22 000 კვადრატული ფუტის ფართობის პატარა ქალაქი სპეციალურად იმისთვის აშენდა, რომ სამართალდამცველებმა კიბერშეტევების სიმულირება და გამოძიება უსაფრთხო, მაგრამ რეალისტურ გარემოში შეძლონ.

ინიციატივა 2025 წლის თებერვალში დაიწყო. ე.წ. „კინეტიკური კიბერ-პოლიგონი“ (Kinetic Cyber Range) მოიცავს ყველაფერს, რაც თანამედროვე ამერიკულ დასახლებას ახასიათებს: საცხოვრებელ სახლებს, სასტუმროს, ბენზინგასამართ სადგურს, სასურსათო მაღაზიას, სასამართლოს, საავადმყოფოსა და ენერგოკომპანიას. ტერიტორიაზე მოწყობილია გზები და შუქნიშნებიც კი.

პროექტის მთავარი მიზანია, გამომძიებლებმა თეორიული ცოდნა პრაქტიკაში გამოიყენონ. ეს განსაკუთრებით მნიშვნელოვანია კიბერდანაშაულის ზრდის ფონზე. FBI-ს 2025 წლის ანგარიშის მიხედვით, კიბერდანაშაულით მიყენებულმა ზარალმა რეკორდულ 20,9 მილიარდ დოლარს მიაღწია, რაც წინა წელთან შედარებით 26%-იანი ზრდაა. ყველაზე დიდ საფრთხედ კვლავ გამოსასყიდი პროგრამები (ransomware) რჩება.

4 ფოტო — დააჭირე გასადიდებლად

ქალაქის თითოეული ნაწილი რეალურ სისტემებთანაა დაკავშირებული. გამომძიებლებს უწევთ მუშაობა ისეთ გარემოში, სადაც მოწყობილობები ზუსტად ისე იქცევიან, როგორც ნამდვილ ბიზნესში ან ოჯახში. პოლიგონზე ასევე განთავსებულია მონაცემთა ცენტრი, რომელიც 200-ზე მეტ ფიზიკურ სერვერს აერთიანებს.

პროგრამის მენეჯერი დეივ ბიჩბორდი აღნიშნავს, რომ ეს გარემო შეგნებულად არის შექმნილი „ცივ, ხმაურიან, ბნელ და არაკომფორტულ“ სივრცეებად, რათა გამომძიებლებმა მაქსიმალურად რეალისტური გამოცდილება მიიღონ. გახსნიდან დღემდე, პოლიგონმა უკვე 1 400-ზე მეტი სტუდენტი გადაამზადა.

პოლიგონი იძლევა შესაძლებლობას, დაიტესტოს კრიტიკული მომენტები, მაგალითად, როდესაც ჰაკერული შეტევის შედეგად საავადმყოფოს სისტემები ითიშება. ეს გამომძიებლებს აიძულებს, მიიღონ სწრაფი და რთული გადაწყვეტილებები, რაც ადამიანების სიცოცხლესთანაა დაკავშირებული.

გარდა ამისა, ობიექტი გამოიყენება ციფრული ფორენსიკისთვის, რაც მოიცავს დაშიფრული მოწყობილობების გატეხვასა და მონაცემების ამოღებას. მიუხედავად იმისა, რომ ეს პროცესი ხშირად საკამათოა, რადგან ეყრდნობა ისეთ დაუცველობებს, რომელთა შესახებაც Apple-მა ან Google-მა შესაძლოა არც იცოდნენ, FBI-სთვის ეს გამოძიების აუცილებელ ნაწილად რჩება.