Google-მა თავისი ინოვაციური აპლიკაციის, NotebookLM-ის მასშტაბური განახლება დააანონსა. ცვლილებები ძირეულად ცვლის იმას, თუ როგორ ურთიერთობენ მომხმარებლები საკუთარ ჩანიშვნებთან და კვლევით მასალებთან. მთავარი სიახლე Google-ის უახლესი მოდელის, Gemini 3.5-ის ინტეგრაციაა, რაც, კომპანიის განცხადებით, უფრო საიმედო და ზუსტ პასუხებს იძლევა.

2023 წელს გაშვებული NotebookLM-ის მთავარი დანიშნულება ხელოვნური ინტელექტის გამოყენებით დოკუმენტებისა და ჩანაწერების ანალიზი იყო. თუმცა, განახლებული ვერსია მომხმარებელს გაცილებით მეტ თავისუფლებას სთავაზობს. ახლა უკვე შესაძლებელია კვლევითი პროექტის დაწყება მხოლოდ კონკრეტული თემის დასმით, ყოველგვარი წინასწარი ფაილების ან YouTube ვიდეოების ატვირთვის გარეშე.

სისტემა Google Search-ის დახმარებით ავტომატურად პოულობს შესაბამის წყაროებს ინტერნეტში. ეს ფუნქცია ეფუძნება „აღმოჩენის“ (discover) შესაძლებლობას, რაც მომხმარებელს ეხმარება, მოკლე დროში შეაგროვოს საჭირო ინფორმაცია კონკრეტული საკითხის გარშემო.

ახალი შესაძლებლობები: ღრუბლოვანი კომპიუტერი და კოდების გენერაცია

NotebookLM ახლა Google-ის „აგენტური“ კოდირების პლატფორმაზე, Antigravity-ზე მუშაობს. თითოეული ნოუთბუქი უკავშირდება უსაფრთხო ღრუბლოვან კომპიუტერს. ეს ინოვაცია აპლიკაციას საშუალებას აძლევს, არა მხოლოდ გააანალიზოს მონაცემები, არამედ დაწეროს და გაუშვას კოდი კვლევითი მიზნებისთვის.

განახლება გაფართოებულ შესაძლებლობებს გვთავაზობს მონაცემთა ექსპორტის კუთხითაც. მომხმარებლებს შეუძლიათ მიიღონ პასუხები და ანალიტიკური შედეგები სხვადასხვა ფორმატში, მათ შორის:

  • PDF დოკუმენტები
  • მონაცემთა ვიზუალიზაციები (PNG, SVG)
  • Nano Banana-ს მიერ გენერირებული სურათები
  • Excel და PowerPoint ფაილები
  • CSV ცხრილები

ამ ეტაპზე განახლება ხელმისაწვდომია Google-ის AI Ultra გეგმის მომხმარებლებისთვის და Workspace-ის კლიენტებისთვის. კომპანია გეგმავს, უახლოეს მომავალში ფუნქციონალი უფრო ფართო აუდიტორიისთვისაც გახსნას.