საქართველოს შინაგან საქმეთა სამინისტრომ მიგრაციის სფეროში საკანონმდებლო ცვლილებების ახალი პაკეტი მოამზადა. ინიციატივა უცხოელი სტუდენტების ქვეყანაში ყოფნის, ბინადრობის ნებართვისა და სწავლის პროცესის რეგულირებას ისახავს მიზნად. ცვლილებები უკვე დარეგისტრირდა საპარლამენტო ბიუროში და მისი განხილვა დაჩქარებული წესით, 2026 წლის 23 ივნისისთვის იგეგმება.

ახალი რეგულაციების თანახმად, უცხოელ სტუდენტებს, რომლებიც სწავლის გაგრძელებას საქართველოს უმაღლეს ან პროფესიულ სასწავლებლებში გეგმავენ, დამატებითი მოთხოვნების დაკმაყოფილება მოუწევთ. მათ მოეთხოვებათ საერთაშორისო ენის სერტიფიკატის წარდგენა ან შეფასებისა და გამოცდების ეროვნული ცენტრის მიერ ორგანიზებული ენის ტესტირების გავლა.

მთავრობა ასევე გეგმავს უცხოელი სტუდენტების მიღებაზე მაქსიმალური კვოტების დაწესებას. საგანმანათლებლო დაწესებულებები ვალდებულნი იქნებიან, სტუდენტების შესახებ მონაცემები ერთიან საინფორმაციო სისტემაში ასახონ. ეს სისტემა ხელმისაწვდომი იქნება სახელმწიფო უწყებებისთვის, რაც სტუდენტთა სტატუსის მონიტორინგს გაამარტივებს.

ცვლილებები სასწავლებლებს მკაცრ ვალდებულებებს აკისრებს. წესების დარღვევის შემთხვევაში, უნივერსიტეტებსა და კოლეჯებს დაეკისრებათ ადმინისტრაციული პასუხისმგებლობა, რაც შეიძლება მოიცავდეს ფულად ჯარიმებს, უცხოელი სტუდენტების მიღების შეზღუდვას ან ავტორიზაციის გაუქმებას.

ბინადრობის ნებართვასთან დაკავშირებული წესებიც მკაცრდება. ნებართვა გაიცემა მხოლოდ იმ შემთხვევაში, თუ პირი აკრედიტებულ სასწავლებელშია ჩარიცხული. სტუდენტს უფლება შეუჩერდება აკადემიური მოთხოვნების შეუსრულებლობის, დასაქმების პირობების დარღვევის ან კანონით განსაზღვრული ვადით ქვეყნიდან არყოფნის შემთხვევაში.

ოფიციალური მონაცემებით, 2025-26 სასწავლო წლისთვის საქართველოში 44 400 უცხოელი სტუდენტის ჩარიცხვაა მოსალოდნელი, რაც წინა წელთან შედარებით 20%-იანი ზრდაა. სტუდენტთა ყველაზე დიდი ჯგუფი ინდოეთის მოქალაქეებისგან შედგება (16 715 სტუდენტი). მათ მოსდევენ ისრაელის, იორდანიის, სუდანის, დიდი ბრიტანეთის, ლიბანისა და ნიგერიის მოქალაქეები. აღსანიშნავია, რომ უცხოელი სტუდენტების 91% სამედიცინო პროგრამებზე სწავლობს, უმეტესწილად — კერძო უნივერსიტეტებში.