დიდი ბრიტანეთის უმსხვილესი საბანკო ჯგუფი, Lloyds Banking Group, აცხადებს, რომ კომპანიის ციფრული სერვისები სრულად აღდგა. რამდენიმე საათის განმავლობაში Lloyds Bank-ის, Halifax-ისა და Bank of Scotland-ის მომხმარებლები ონლაინ ბანკინგსა და მობილურ აპლიკაციებზე წვდომას ვერ ახერხებდნენ.

პრობლემები ოთხშაბათს, ბრიტანეთის დროით დაახლოებით 11:15 საათზე დაიწყო. მონიტორინგის პლატფორმა Downdetector-ზე ათასობით მომხმარებელმა დააფიქსირა, რომ აპლიკაციაში შესვლას ან ანგარიშების მართვას ვერ ახერხებდნენ.

ბანკის წარმომადგენელმა ოფიციალურად დაადასტურა, რომ სისტემური ხარვეზი უკვე გამოსწორებულია. „ყველა ჩვენი სერვისი კვლავ გამართულად მუშაობს. ბოდიშს ვიხდით შექმნილი დისკომფორტისთვის“, — ნათქვამია ბანკის განცხადებაში.

ტექნიკური შეფერხების დროს მომხმარებლები ეკრანზე „503 error“ შეტყობინებას ხედავდნენ, რაც სერვერის გადატვირთვას ან მის დროებით მიუწვდომლობას მიანიშნებს. სოციალურ ქსელში მომხმარებლები წერდნენ, რომ ვერ ახერხებდნენ თანხების გადარიცხვას ან ანგარიშის ბალანსის შემოწმებას.

Halifax-მა სოციალურ ქსელ X-ზე მომხმარებლებს მოუწოდა, გარკვეული დროის შემდეგ კვლავ ეცადათ აპლიკაციაში შესვლა. ჯგუფი, რომელიც 26 მილიონამდე მომხმარებელს ემსახურება, ამ დროისთვის სრულად აღდგენილ ოპერაციულ რეჟიმში აგრძელებს მუშაობას.

შეგახსენებთ, რომ Lloyds Banking Group-ისთვის მსგავსი ტექნიკური ინციდენტი პირველი არ არის. მიმდინარე წლის მარტში ჯგუფმა მასშტაბური IT-ხარვეზი განიცადა, რის გამოც ნახევარ მილიონამდე მომხმარებლის ტრანზაქციები და პერსონალური მონაცემები სხვა პირთათვის გახდა ხილვადი.

2 ფოტო — დააჭირე გასადიდებლად