კიბერდანაშაულის სამყაროში ახალი, საგანგაშო ტენდენცია გამოიკვეთა. Google-ის კიბერუსაფრთხოების გუნდებისა და FBI-ს ერთობლივი მოკვლევის თანახმად, ჰაკერული დაჯგუფება Silent Ransom Group-ი მსხვერპლთა კომპანიებში ფიზიკურად შეღწევას ახერხებს. ისინი თავს IT-სპეციალისტებად ასაღებენ და ოფისებში უშუალოდ შედიან, რათა მონაცემები მოიპარონ.

მიმდინარე წლის იანვრიდან მაისამდე პერიოდში, დაჯგუფებამ ათეულობით ორგანიზაცია, ძირითადად კი იურიდიული ფირმები დააზარალა. მათი მეთოდი დახვეწილია: „ყალბი IT-მხარდაჭერა“ ოფისში შედის, უკავშირდება თანამშრომლების კომპიუტერებს და USB-მოწყობილობების ან დისტანციური წვდომის პროგრამების საშუალებით აკოპირებს კონფიდენციალურ ინფორმაციას.

როგორ მოქმედებენ დამნაშავეები?

დაჯგუფება მხოლოდ ფიზიკური შეღწევით არ იფარგლება. ტრადიციული მეთოდები კვლავ აქტუალურია: ფიშინგ-ელფოსტები, სატელეფონო ზარები და სოციალური ინჟინერია. ჰაკერები მსხვერპლს არწმუნებენ, რომ საჭიროა ტექნიკური პრობლემის მოგვარება ან მონაცემთა მიგრაცია.

ამ საუბრების დროს ისინი მსხვერპლს ეკრანის გაზიარების სესიის დაწყებას სთხოვენ. ხშირად იყენებენ ისეთ პოპულარულ პროგრამებს, როგორიცაა Zoom ან Microsoft Teams. მას შემდეგ, რაც წვდომას მიიღებენ, ჰაკერები უკვე უსაფრთხოების სისტემების გვერდის ავლით იწყებენ მონაცემების ექსფილტრაციას.

„Mandiant-მა არაერთხელ გამოიძია შემთხვევები, როდესაც მოწინააღმდეგეები რგავდნენ აგენტებს, ქრთამავდნენ თანამშრომლებს ან ფიზიკურად იჭრებოდნენ შენობებში კიბერშეტევების განსახორციელებლად“, — აცხადებს Mandiant-ის ტექნიკური დირექტორი ჩარლზ კარმაკალი.

შანტაჟი და მონაცემების გაჟონვა

Silent Ransom Group-ი ტრადიციული გამოსასყიდი ვირუსებისგან განსხვავებულ ტაქტიკას მიმართავს. ისინი მონაცემებს ყოველთვის არ შიფრავენ, არამედ იპარავენ და შემდეგ შანტაჟის გზით ცდილობენ ფულის გამოძალვას. მათ აქვთ საკუთარი ვებგვერდი, სადაც მოპარულ მონაცემებს აქვეყნებენ, თუ კომპანია მათ მოთხოვნებს არ დააკმაყოფილებს.

ჰაკერები პირდაპირ ემუქრებიან მსხვერპლს: „თუ არ შეგვეთანხმებით, ჩვენ ვაცნობებთ თქვენს თანამშრომლებს, პარტნიორებსა და კლიენტებს, რის შემდეგაც თქვენს მონაცემებს საჯაროდ გამოვაქვეყნებთ“. FBI-ს განცხადებით, ეს სქემა უკვე ფართოდ გავრცელებული პრაქტიკაა, რომელიც სერიოზულ საფრთხეს უქმნის კორპორატიულ უსაფრთხოებას.