Meta-ს სოციალურმა პლატფორმა Threads-მა ოფიციალურად დაადასტურა, რომ მისი ყოველთვიური აქტიური მომხმარებლების რაოდენობამ 500 მილიონს მიაღწია. ეს შედეგი პლატფორმისთვის, რომელიც Twitter-ის (ამჟამად X) კონკურენტად ჩამოყალიბდა, მნიშვნელოვანი წინგადადგმული ნაბიჯია.
განვითარების პარალელურად, კომპანიამ მომხმარებლებს ახალი ფუნქციები შესთავაზა. მათ შორისაა „Your Algo“ — ინსტრუმენტი, რომელიც ადამიანებს საკუთარი ფიდის შინაარსის მართვის საშუალებას აძლევს.
აქამდე Threads-ზე არსებობდა „Dear Algo“-ს ფუნქცია, რომელიც საჯარო პოსტების მეშვეობით ალგორითმისთვის მიმართვას გულისხმობდა. ახალი ინსტრუმენტი კი პროცესს აპრივატულებს: მომხმარებელს შეუძლია, კონკრეტულ თემებზე პრიორიტეტის მინიჭება ან შეზღუდვა ისე მოახდინოს, რომ ეს სხვებისთვის ხილული არ იყოს. ცვლილება ძალაშია ერთი, სამი ან შვიდი დღის განმავლობაში.
აღნიშნული ფუნქცია ამ ეტაპზე აშშ-ში, კანადაში, გაერთიანებულ სამეფოში, ავსტრალიასა და ახალ ზელანდიაში ვრცელდება.
Threads-ი ასევე აქტიურად ავითარებს „Communities“-ის მიმართულებას, რომელიც ბეტა ვერსიიდან გამოდის. ეს სივრცეები მომხმარებლებს საშუალებას აძლევს, გაერთიანდნენ საერთო ინტერესების გარშემო — იქნება ეს სპორტი, კინო თუ წიგნები.
ახალი „Communities Hub“-ის დახმარებით, სასურველი ჯგუფების აღმოჩენა ბევრად მარტივი გახდება. ინსტაგრამის ხელმძღვანელი კონორ ჰეისი აღნიშნავს, რომ მიზანი აპლიკაციის უფრო მიზანმიმართულად გამოყენებაა.
გარდა ამისა, პლატფორმა აფართოებს „Live Chats“-ის ფუნქციას. ეს ინსტრუმენტი პირდაპირ რეჟიმში კომუნიკაციის საშუალებას იძლევა, რაც განსაკუთრებით პოპულარულია მსხვილი კულტურული თუ სპორტული ღონისძიებების დროს. ივლისისთვის Live Chat-ები ხელმისაწვდომი იქნება ყველა თემისთვის.
Threads-ის ზრდის ტემპი შთამბეჭდავია: ბოლო 10 თვეში პლატფორმას 100 მილიონი ახალი მომხმარებელი შეემატა. მიუხედავად იმისა, რომ თავდაპირველად მას ძირითადი ფუნქციები აკლდა, დღეს ის უკვე სერიოზულ კონკურენციას უწევს X-ს და ცდილობს, საკუთარი უნიკალური გამოცდილება შესთავაზოს აუდიტორიას.
დისკუსია
0 კომენტარი
ჯერ კომენტარი არ არის — იყავი პირველი.