აშშ-ის ფედერალურმა საგამოძიებო ბიურომ (FBI) თეთრი სახლის ტერიტორიაზე დაგეგმილი ტერაქტი აღკვეთა. თავდასხმის სამიზნე გასულ კვირას, აშშ-ის 250-ე წლისთავისა და დონალდ ტრამპის 80 წლის იუბილესთან დაკავშირებით გამართული UFC-ის საჩვენებელი ტურნირი იყო.

FBI-ის დირექტორმა, კეშ პატელმა სოციალურ ქსელში დაადასტურა, რომ უწყებამ „მრავალშტატიანი სპეცოპერაციის“ ფარგლებში რამდენიმე ეჭვმიტანილი დააკავა. პატელის თქმით, დაგეგმილი თავდასხმები დროულად იქნა შეჩერებული.

თავდასხმის დეტალები

გამოძიების ინფორმაციით, თავდამსხმელები მასშტაბური დივერსიისთვის ემზადებოდნენ. წყაროებზე დაყრდნობით, CBS News იტყობინება, რომ დამნაშავეები ასაფეთქებელი ნივთიერებებით დატვირთული დრონების გამოყენებას გეგმავდნენ, რომლებითაც თეთრი სახლის მიმდებარე შენობებზე იერიში უნდა მიეტანათ.

შემუშავებული სცენარის მიხედვით, დრონების გამოყენებას პანიკის დათესვა და ხალხის მასის გაქცევის პროვოცირება უნდა მოჰყოლოდა. დამფრთხალი ხალხი წინასწარ პოზიციონირებული სნაიპერების სამიზნეში უნდა აღმოჩენილიყო, რასაც „მეორე ტალღის“ სახით თეთრი სახლის ჭიშკარზე შტურმი მოჰყვებოდა.

გამოძიების მიმდინარეობა

სამართალდამცავებმა ეჭვმიტანილების კვალი Signal-ის ჩატებში მიღებული ინფორმაციის საფუძველზე იპოვეს. ერთ-ერთი მთავარი ეჭვმიტანილი სინცინატიში გასულ კვირას დააკავეს.

საკონსტიტუციო უსაფრთხოების სამსახურის (Secret Service) დირექტორმა, შონ კურანმა განაცხადა, რომ უწყება FBI-თან მჭიდრო კოორდინაციაში მუშაობდა. კურანის თქმით, საქმის დეტალები საჯაროდ სასამართლო პროცესების დაწყებისას გახდება ცნობილი.

შეგახსენებთ, რომ UFC 250, რომელიც თეთრი სახლის სამხრეთ გაზონზე გაიმართა, აშშ-ის ისტორიაში გამორჩეულ ღონისძიებად ითვლება. მასზე ადმინისტრაციის მაღალჩინოსნები და ცნობილი სახეებიც იმყოფებოდნენ.