პალესტინის ფეხბურთის ასოციაციის პრეზიდენტი ჯიბრილ რაჯუბი ამჟამად მეხიკოში იმყოფება და აშშ-ის ვიზას ელოდება. მიუხედავად იმისა, რომ იგი ფიფას მიერ აკრედიტებული პირია, მსოფლიო ჩემპიონატზე დასასწრებად საჭირო ნებართვა მას ამ დრომდე არ მიუღია.

რაჯუბმა უკვე დაესწრო ჩემპიონატის გახსნით მატჩს მექსიკასა და სამხრეთ აფრიკას შორის. თუმცა, ის ერთადერთი არ არის, ვინც მსგავსი პრობლემის წინაშე აღმოჩნდა. აშშ-ის ხელისუფლებამ ვიზაზე უარი უთხრა სხვადასხვა ქვეყნის არაერთ დელეგატს, მათ შორის სომალელ მსაჯსა და ერაყის ნაკრებთან ერთად მოგზაურ ფოტოგრაფს.

პოლიტიკური დაძაბულობა ფეხბურთის მიღმა

ჯიბრილ რაჯუბმა მომხდარს უსამართლო უწოდა. მისი თქმით, ფეხბურთელებისა და ოფიციალური პირებისთვის ტურნირზე დასწრების უფლების შეზღუდვა დაუშვებელია.

„არ მიმაჩნია სამართლიანად, რომ ვინმეს უფლება შეეზღუდოს მსოფლიო ჩემპიონატზე დასწრებისა და მონაწილეობის“

ამერიკის შეერთებული შტატების სახელმწიფო დეპარტამენტს რაჯუბის ვიზასთან დაკავშირებით ოფიციალური კომენტარი არ გაუკეთებია. ცნობილია, რომ გასულ წელს აშშ-მა პალესტინის პასპორტის მფლობელებზე, განსაკუთრებით კი პალესტინის ადმინისტრაციის ყოფილ და მოქმედ თანამშრომლებზე, ვიზის გაცემის ახალი, გამკაცრებული წესები აამოქმედა.

ფიფას პოზიცია

ფიფას პრეზიდენტმა ჯანი ინფანტინომ აღიარა, რომ ორგანიზაცია ცდილობს ვიზებთან დაკავშირებული საკითხების მოგვარებას. თუმცა, მანვე დასძინა, რომ ფიფას არ აქვს უფლებამოსილება, გადაწყვეტილება შეაცვლევინოს აშშ-ის მთავრობას. „ჩვენ არ ვართ მსოფლიოს მეფეები, რომ მთავრობებისა და პოლიციის გადაწყვეტილებებზე ვიბატონოთ“, — განაცხადა ინფანტინომ.

აღსანიშნავია, რომ პალესტინური მხარე მუდმივად აკრიტიკებს ფიფას ისრაელის მიმართ ლოიალური პოლიტიკის გამო. რაჯუბი და მისი კოლეგები აცხადებენ, რომ ისრაელი არღვევს ფიფას წესდებას, რადგან ოკუპირებულ დასავლეთ სანაპიროზე არსებული დასახლებების გუნდებს ისრაელის ეროვნულ ლიგაში თამაშის უფლებას აძლევს.

პალესტინის ფეხბურთის ასოციაციის მონაცემებით, ღაზას სექტორში მიმდინარე საომარმა მოქმედებებმა გაანადგურა სპორტული ინფრასტრუქტურის 80 პროცენტი და შეიწირა სულ მცირე 565 ფეხბურთელი. გასულ თვეში რაჯუბმა უარი თქვა ისრაელის ფეხბურთის ფედერაციის ხელმძღვანელისთვის ხელის ჩამორთმევაზე, რაც მან ახალი ჭრილობების მიყენების თავიდან აცილებით ახსნა.