დიდი ბრიტანეთიდან საფრანგეთში დეპორტირებული თავშესაფრის მაძიებლები ქვეყანაში არალეგალურად, სატვირთო მანქანების საშუალებით ბრუნდებიან. „The Guardian“-თან საუბარში ერთ-ერთმა ასეთმა პირმა განაცხადა, რომ ის და მასთან ერთად სულ მცირე 18 სხვა ადამიანი, რომლებიც პროგრამის ფარგლებში გააძევეს, ბრიტანეთში კვლავ მალულად ცხოვრობენ.

„ერთი შევიდა, ერთი გავიდა“ შეთანხმების მიზანი ლა-მანშის სრუტეზე ნავებით გადასვლის შეჩერება და ადამიანების გადამყვანი კრიმინალური დაჯგუფებების საქმიანობის აღკვეთა იყო. თუმცა, როგორც ჩანს, კონტრაბანდისტებმა ბიზნესმოდელი შეცვალეს და მიგრანტებს ნავების ნაცვლად, ბევრად ძვირი და სახიფათო მარშრუტები შესთავაზეს.

სასოწარკვეთილი დაბრუნება

ინტერვიუში დეპორტირებულმა მამაკაცმა მოყვა, რომ საფრანგეთში დაბრუნების შემდეგ მას ადგილობრივი კონტრაბანდისტები დაუპირისპირდნენ. მათ მამაკაცის იძულება სცადეს, რომ კრიმინალურ საქმიანობაში ჩართულიყო, რაზეც მან უარი განაცხადა. „მათ ისე სასტიკად მცემეს, რომ სახეზე დღემდე დამალურჯებული და დაზიანებული მაქვს“, — ყვება ის.

მისი თქმით, ბრიტანეთში დაბრუნება ერთადერთ გამოსავლად მიიჩნია, რადგან საფრანგეთში დარჩენა მის სიცოცხლეს საფრთხეს უქმნიდა. ამჟამად ის ლონდონის მიღმა, ერთ-ერთ ქალაქში მალულად აფარებს თავს და გარეთ გასვლისაც კი ეშინია. „მე არ მაქვს ცხოვრება, არ მაქვს გეგმები. ვემალები კონტრაბანდისტებს, პოლიციას და შინაგან საქმეთა სამინისტროს“, — აცხადებს ის.

კრიმინალური ბიზნესის ადაპტაცია

მიგრანტების განცხადებით, თუ ნავით გადასვლა 1 000-დან 2 000 ევრომდე ღირს, სატვირთო მანქანით ბრიტანეთში მოხვედრა 4 000-დან 5 000 ევრომდე ჯდება. კრიმინალური დაჯგუფებები ახლა ხშირად ბელგიის პორტებს იყენებენ და უფრო ძვირადღირებულ სერვისებს სთავაზობენ, რათა საფრანგეთის სანაპიროებზე პოლიციას თავი აარიდონ.

„Home Office“-ის წარმომადგენელი აცხადებს, რომ ბრიტანეთში დაბრუნების მცდელობა დროისა და ფულის ფუჭი ხარჯვაა. უწყების მონაცემებით, მიმდინარე წლის 28 აპრილის მდგომარეობით, საფრანგეთში 605 ადამიანი გააბრუნეს, ხოლო ბრიტანეთში 581 პირი შემოვიდა.

პრობლემური სისტემა

მიგრაციის საკითხებზე მომუშავე ორგანიზაციები მთავრობის პოლიტიკას აკრიტიკებენ. მათი განცხადებით, არსებული სასაზღვრო რეჟიმი ადამიანებს არალეგალურ და სახიფათო მარშრუტებისკენ უბიძგებს და მათ კრიმინალიზაციას ახდენს. უფლებადამცველები მიიჩნევენ, რომ საჯარო რესურსები ადამიანების დევნის ნაცვლად, საჯარო სერვისების გაუმჯობესებას უნდა მოხმარდეს.

ამასთან, დაფიქსირდა შემთხვევები, როდესაც ბრიტანეთიდან წლების შემდეგ წასულ პირებს შინაგან საქმეთა სამინისტრო კვლავ უგზავნის შეტყობინებებს დეპორტაციის შესახებ, რაც მიუთითებს იმაზე, რომ უწყებას ხშირად არ აქვს ინფორმაცია იმის შესახებ, ვინ დატოვა ქვეყანა ნებაყოფლობით.