აშშ-ის სასაქონლო ფიუჩერსების სავაჭრო კომისიის (CFTC) მაღალჩინოსნები, რომლებმაც კრიპტოინდუსტრიის გავლენიანი კომპანიების საქმიანობა ეჭვქვეშ დააყენეს, სამსახურიდან გაათავისუფლეს. The New York Times-ის მიერ ჩატარებული გამოძიების თანახმად, საუბარია თანამშრომლებზე, რომლებმაც Polymarket-ის, Crypto.com-ისა და Gemini-ს აფილირებული კომპანიების მიმართ სერიოზული რეგულაციური პრეტენზიები გამოთქვეს.

რა მოხდა უწყებაში?

გამოძიების მიხედვით, მარეგულირებლის კადრებს აწუხებდათ ის ფაქტი, რომ Crypto.com არასათანადოდ ეპყრობოდა მცირე ინვესტორებს, Polymarket-ს კი არ ჰქონდა თაღლითობისგან დაცვის ადეკვატური მექანიზმები. Gemini-ს შემთხვევაში პრობლემას ის წარმოადგენდა, რომ აფილირებულმა კომპანიამ არ გაიარა სავალდებულო მარეგულირებელი შემოწმება.

მიუხედავად გაფრთხილებებისა, CFTC-ის მაშინდელმა თავმჯდომარემ, ქეროლაინ ფემმა და მისმა იურიდიულმა მრჩევლებმა, გავრცელებული ინფორმაციით, ხელი შეუწყვეს ამ კომპანიების ინტერესების გატარებას. 2025 წლის ბოლოსთვის, ყველა ის თანამშრომელი, ვინც პროცესზე კითხვები დასვა, ადმინისტრაციულ შვებულებაში გაუშვეს და მათ მიმართ შიდა გამოძიება დაიწყო.

ცვლილებები მარეგულირებლის მიდგომაში

ანგარიშის თანახმად, CFTC-მ კრიპტოვალუტების სექტორში მკაცრი ზედამხედველობა პრაქტიკულად შეწყვიტა. თუ ბაიდენის ადმინისტრაციის პერიოდში უწყება 80-ზე მეტ საქმეს აწარმოებდა, ტრამპის მმართველობისას ეს მაჩვენებელი ორამდე შემცირდა.

საინტერესოა კადრების როტაციაც:

  • ქეროლაინ ფემი უწყებიდან MoonPay-ში გადავიდა, რომელიც Polymarket-ის პარტნიორია.
  • მისი უფროსი მრჩეველი ბრიჯიტ უეილსი Gemini Titan-ის გენერალური მრჩეველი გახდა.
  • ამჟამინდელი თავმჯდომარე მაიკლ სელიგი, რომელიც კომისიის ერთადერთი წევრია, მანამდე კორპორატიული იურისტის რანგში სწორედ კრიპტოკომპანიებს წარმოადგენდა.

გამოძიება მიუთითებს, რომ ეს მოვლენები აშშ-ის პოლიტიკურ ელიტასთან კავშირებს უკავშირდება. მაგალითად, Crypto.com Trump Media-ს საქმიანი პარტნიორია, ხოლო Polymarket-ში ინვესტიცია დონალდ ტრამპ უმცროსთან დაკავშირებულმა ფონდმა ჩადო.

თანამშრომლებისთვის გზავნილი ცხადი იყო: ნუ შეუქმნით პრობლემებს ამ ინდუსტრიას, - ნათქვამია NYT-ის ანგარიშში.

თეთრი სახლის სპიკერის, დევის ინგლის განცხადებით, პრეზიდენტი ტრამპი მხოლოდ ამერიკელი ხალხის ინტერესებიდან გამომდინარე მოქმედებს და ინტერესთა კონფლიქტი არ არსებობს.