რუსეთის ხელისუფლებამ 17 წლის ბრიტანელი მოზარდი, ალექსანდრე ბროუდერი დაასანქცირა. ამის მიზეზი გახდა მისი კვლევა, რომელიც კრემლის მიერ სანქციების გვერდის ავლის მიზნით ციფრული აქტივების გამოყენებას ეხება. ბროუდერი ცნობილი ამერიკელ-ბრიტანელი აქტივისტის, ბილ ბროუდერის შვილია.

ალექსანდრე ბროუდერმა სოციალურ ქსელ X-ში განაცხადა, რომ „გლობალური კრიპტოვალუტის ფულის გათეთრების მონაცემთა ბაზის“ (Global Cryptocurrency Laundering Database) მეშვეობით მან კორუფციული სქემები გამოავლინა. სწორედ ამ საქმიანობის გამო გახდა ის ავტორიტარული რეჟიმის სამიზნე.

მისი კვლევის მთავარი ფოკუსი A7A5 სტეიბლკოინი იყო, რომელიც რუსულ რუბლზეა მიბმული. ბროუდერის მტკიცებით, აღნიშნული აქტივი „პრომსვიაზბანკის“ დეპოზიტებით იყო უზრუნველყოფილი და რუსეთი მას დასავლური სანქციების დასაძლევად იყენებდა. „A7A5 დასავლეთისთვის ერთ-ერთ მთავარ პრობლემას წარმოადგენს. მიუხედავად იმისა, რომ ის დიდ ბრიტანეთში, აშშ-სა და ევროკავშირში სანქცირებულია, სისტემა კვლავ ფუნქციონირებს“, — აცხადებს ბროუდერი.

CertiK-ის უახლესი ანგარიშის მიხედვით, ამ სტეიბლკოინმა 110 მილიარდ დოლარზე მეტი ტრანზაქცია გაატარა. ევროკავშირმა A7A5 2025 წლის ოქტომბერში დაასანქცირა, რადგან მიიჩნია, რომ ის ომთან დაკავშირებული ფინანსური შეზღუდვების გვერდის ავლისთვის იყო განკუთვნილი.

ბრიტანული გამოცემა The Times-ის ინფორმაციით, 17 წლის ბროუდერი, სავარაუდოდ, ყველაზე ახალგაზრდა პირია, ვინც რუსეთის მიერ სანქცირებულთა სიაში მოხვდა. რუსეთის პარლამენტმა კი, პარალელურად, საკანონმდებლო ცვლილებები დააინიცირა, რომელიც 2027 წლის ივლისიდან არალიცენზირებული კრიპტოპლატფორმების სრულ აკრძალვას და სისხლისსამართლებრივ პასუხისმგებლობას ითვალისწინებს.