კრიპტოვალუტის ბაზარზე მიმდინარე რყევებისა და მაკროეკონომიკური გამოწვევების მიუხედავად, რეალური აქტივების (RWA) ტოკენიზაცია სექტორის ერთ-ერთ ყველაზე მყარ და მზარდ მიმართულებად რჩება. Binance Research-ის უახლესი ანგარიშის თანახმად, 2025 წლის დასაწყისიდან 2026 წლის ივნისამდე პერიოდში აქტიური ტოკენიზებული RWA-ების ბაზარი 589%-ით გაიზარდა.

ამ ზრდაში მთავარი როლი ობლიგაციებმა და ფულადი ბაზრის ფონდებმა ითამაშეს. სექტორმა 83%-იანი ზრდა აჩვენა, რაც დოლარში გამოსახულებით 6.5 მილიარდს უტოლდება.

ყველაზე სწრაფი დინამიკით ტოკენიზებული აქციები გამოირჩევიან, რომელთა საბაზრო ღირებულება 422%-ით გაიზარდა. ამ ტენდენციას ხელი შეუწყო Ondo Global Markets-ის მსგავსმა პლატფორმებმა, რომელმაც გაშვებიდან რვა თვეში 1 მილიარდ დოლარზე მეტი ღირებულების აქტივები დააგროვა.

ინვესტორების ინტერესი არც ძვირფასი ლითონების მიმართ შენელებულა. ტოკენიზებულმა ოქრომ 1.5 მილიარდი დოლარის დამატებითი ღირებულება მიიღო, რაც 39%-იან ზრდას ნიშნავს. ძირითადი მოთხოვნა იანვარსა და თებერვალში დაფიქსირდა, როდესაც გეოპოლიტიკურმა გაურკვევლობამ ინვესტორები უსაფრთხო აქტივებისკენ უბიძგა.

„2026 წელი RWA ტოკენიზაციისთვის გარდამტეხი აღმოჩნდა. ეს აღარ არის მხოლოდ სახაზინო ვალდებულებებზე დაფუძნებული ნარატივი, არამედ დივერსიფიცირებული შემოსავლიანი ეკოსისტემაა“, — აღნიშნულია Binance-ის ანგარიშში.

ტოკენიზაციის ტალღა უკვე კერძო კომპანიების აქციებსაც შეეხო. მაგალითად, SpaceX-ის ტოკენიზებულმა აქციებმა, რომლებიც Kraken-ის xStocks პლატფორმის მეშვეობით ხელმისაწვდომია, რვა თვეში 25 მილიარდ დოლარზე მეტი სავაჭრო ბრუნვა დააფიქსირა.

ინსტიტუციური დონის დანერგვა სხვა აქტივებშიც შეიმჩნევა. უძრავი ქონების სექტორში Apex Group-მა Goldman Sachs-ის ციფრული აქტივების პლატფორმის გამოყენება დაიწყო, რაც ბლოკჩეინზე დაფუძნებულ ანგარიშსწორებაზე მზარდ მოთხოვნას ადასტურებს.

საბანკო სისტემაც აქტიურად მუშაობს ინფრასტრუქტურის მოდერნიზაციაზე. The Wall Street Journal-ის ცნობით, მსხვილი ბანკების კონსორციუმი, მათ შორის JPMorgan Chase და Citibank, მომავალი წლიდან ტოკენიზებული დეპოზიტების ქსელის გაშვებას გეგმავს. ეს ნაბიჯი ტოკენიზაციის ტრადიციულ საბანკო სისტემაში სრულ ინტეგრაციას ისახავს მიზნად.