ლონდონის ახალი მუზეუმი ოფიციალურად 28 ნოემბერს გაიხსნება. მსოფლიოს უდიდესი საქალაქო მუზეუმის სტატუსის მქონე დაწესებულება Smithfield Market-ის ისტორიულ შენობაში განთავსდება.

პროექტი, რომლის ბიუჯეტი 437 მილიონ ფუნტ სტერლინგს შეადგენს, ლონდონის ისტორიის გაცოცხლებას ისახავს მიზნად. მუზეუმის დირექტორის, შერონ ამენტის თქმით, მიზანი ლონდონელების სიამაყის გრძნობის გაღვივებაა.

მუზეუმის ინფრასტრუქტურა სამ ძირითად ნაწილად იყოფა. შესასვლელი, სახელწოდებით „Real Time“, რეალურ დროში ასახავს ლონდონის ყოველდღიურ მონაცემებს. შემდგომი სივრცე, „Our Time“, განკუთვნილია ინტერაქტიული ღონისძიებებისა და იმერსიული თეატრალური წარმოდგენებისთვის.

სარდაფის დონეზე განთავსებული იქნება „Past Time“ — გალერეები, სადაც ლონდონის მრავალსაუკუნოვანი ისტორია ქრონოლოგიურად არის წარმოდგენილი. ვიზიტორებს შეეძლებათ იხილონ უნიკალური ექსპონატები, მათ შორის:

London Museum
  • Banksy-ს პირანიები;
  • დიდი ბრიტანეთის უძველესი ხელნაწერი დოკუმენტი;
  • The Clash-ის წევრის, პოლ სიმონონის ცნობილი ბას-გიტარა;
  • ანა პავლოვას საბალეტო კოსტიუმი „მომაკვდავი გედისთვის“;
  • ტომ დეილის სამოსი 2012 წლის ლონდონის ოლიმპიადიდან.

მუზეუმი მხოლოდ საგამოფენო სივრცე არ იქნება. ის ფუნქციონირებს როგორც სოციალური ცენტრი, სადაც გაიმართება ვახშმები, კლუბური ღამეები და თემატური შეხვედრები. აღსანიშნავია, რომ მუზეუმის სარდაფში Thameslink-ის მატარებლები პირდაპირ გალერეების გავლით იმოძრავებენ.

Smithfield-ის Poultry Market-ის ნაწილი პროექტის ფარგლებში მოგვიანებით, 2028 წელს გაიხსნება. მუზეუმის განვითარება ლონდონის კორპორაციისა და მერის, სადიკ ხანის პარტნიორობით, ასევე ფილანთროპული ფონდების მხარდაჭერით განხორციელდა.