ოკუპირებული აფხაზეთის ე.წ. დედაქალაქსა და რუსეთის ქალაქ ორენბურგს შორის პირდაპირი საჰაერო მიმოსვლა ივლისიდან ამოქმედდება. აღნიშნულ მარშრუტს ავიაკომპანია „რუსლაინი“ მოემსახურება.

პირველი რეისი სოხუმის მიმართულებით 8 ივლისს შესრულდება, ხოლო საპირისპირო მიმართულებით თვითმფრინავი 9 ივლისს გაფრინდება. ავიაკომპანიის განრიგის მიხედვით, ფრენები კვირაში ერთხელ განხორციელდება და სეზონური ხასიათი ექნება — მიმოსვლა 3 სექტემბრამდე გაგრძელდება.

ფრენის ხანგრძლივობა სამ საათზე ოდნავ ნაკლებია. სოხუმიდან თვითმფრინავები ყოველ ოთხშაბათს, საღამოს 19:10 საათზე აფრინდებიან და ორენბურგში შუაღამისას ჩაფრინდებიან. უკან, ორენბურგიდან, რეისები ხუთშაბათობით, 11:50 საათზე იგეგმება, ხოლო სოხუმში მგზავრები 12:35 საათზე ჩავლენ.

ამ მარშრუტზე კომპანია Bombardier CRJ100/200-ის ტიპის 50-ადგილიან საჰაერო ხომალდებს გამოიყენებს. ბილეთები უკვე გაყიდვაშია და მათი შეძენა „რუსლაინის“ ოფიციალურ ვებგვერდზეა შესაძლებელი.

აღსანიშნავია, რომ ოკუპირებული აფხაზეთის მიმართულებით რუსეთიდან ფრენების ინტენსივობა იზრდება. პარალელურად, ივლისიდან პირდაპირი რეისების დაწყება ეკატერინბურგიდანაც იგეგმება.