უორენ ბაფეტი და ილონ მასკი ბიზნესის მართვის სრულიად განსხვავებულ მიდგომებს წარმოადგენენ. ბაფეტი, რომელიც ათწლეულებია „თხრილის“ (moat) კონცეფციას იყენებს, კომპანიის წარმატებას მისი კონკურენტული უპირატესობის მდგრადობაში ხედავს. თავის მხრივ, ილონ მასკი თვლის, რომ „თხრილები“ მოძველებული და უსარგებლოა.

მასკის პოზიცია საჯაროდ 2018 წელს, Tesla-ს კვარტალური ანგარიშგების დროს დაფიქსირდა. როდესაც ინვესტორმა მასკს ჰკითხა, თუ რატომ ხსნის Tesla თავის სუპერჩამტენების ქსელს კონკურენტებისთვის, მასკმა უპასუხა: „თხრილები სულელურია. თუ თქვენი ერთადერთი თავდაცვა დამპყრობელი არმიების წინააღმდეგ თხრილია, დიდხანს ვერ გაძლებთ. მთავარი ინოვაციების ტემპია“.

უორენ ბაფეტმა ამ კრიტიკას საპასუხო იუმორით უპასუხა. ბერკშირ ჰეთევეის აქციონერთა ყოველწლიურ შეხვედრაზე მან განაცხადა, რომ მასკი ალბათ ვერ გაბედავდა ბაფეტის საკონდიტრო ბიზნესთან დაპირისპირებას. მასკმა ეს გამოწვევად მიიღო და სოციალურ ქსელში „კრიპტო-კანფეტების“ წარმოების გეგმებზეც კი ისაუბრა.

რატომ არის ბრენდი „თხრილი“?

ბაფეტის აზრით, ძლიერი ბრენდი არის ერთგვარი ფსიქოლოგიური ბარიერი, რომელიც მომხმარებელს არჩევანის გაკეთებისას კონკრეტული პროდუქტისკენ მიმართავს. მაგალითად, Snickers-ი ან Coca-Cola ათწლეულებია ინარჩუნებენ პოზიციებს სწორედ ამ „თხრილის“ წყალობით. როდესაც მომხმარებელი მაღაზიაში მიდის, ის ითხოვს კონკრეტულ ბრენდს და არა მის იაფ ალტერნატივას.

„ბრენდები არის თხრილები. თუ თქვენ ცდილობთ გაყიდოთ პროდუქტი, რომელიც მილიონებს სურთ, მხოლოდ ფასის ოდნავ დაკლებით ვერ შეძლებთ კონკურენციას“, — განმარტავს ბაფეტი. მისი თქმით, ისეთი კომპანიები, როგორიცაა WD-40, Elmer's Glue ან Apple-ის iPhone, ფლობენ უზარმაზარ კონკურენტულ უპირატესობას, რადგან მათი მომხმარებლები ლოიალურები არიან და არ ეძებენ ალტერნატივებს.

ინოვაცია თუ სტაბილურობა?

მიუხედავად განსხვავებული შეხედულებებისა, ბაფეტი აღიარებს მასკის ამბიციებს. „ის ცდილობს გააუმჯობესოს პროდუქტი და მე მას პატივს ვცემ ამისთვის. საზოგადოება გადაწყვეტს, რამდენად წარმატებული იქნება ეს“, — აღნიშნა ინვესტორმა. თუმცა, ბაფეტი კვლავ რჩება თავისი პრინციპების ერთგული: „ალბათ უფრო ადვილია ახალი მანქანის შექმნა, ვიდრე Snickers-თან კონკურენცია“.

ბაფეტი ასევე აქტიურად იყენებს მარკეტინგულ ინსტრუმენტებს თავისი კომპანიების გასაძლიერებლად. მაგალითად, GEICO-ს სადაზღვევო კომპანია უკვე იყენებს ხელოვნური ინტელექტით მართულ პერსონაჟებს, რათა ბრენდის ცნობადობა კიდევ უფრო გაზარდოს და შეინარჩუნოს თავისი „თხრილი“ ბაზარზე.

3 ფოტო — დააჭირე გასადიდებლად