Dow Jones Industrial Average-მა კიდევ ერთი ისტორიული მაქსიმუმი დააფიქსირა. ბაზარზე ოპტიმიზმი აშშ-სა და ირანს შორის მიღწეულმა სამშვიდობო შეთანხმებამ განაპირობა, რამაც ნავთობის ფასების კლება გამოიწვია.

ინდექსი 365 პუნქტით, ანუ 0.7%-ით გაიზარდა. ზრდას ხელი შეუწყო ისეთმა გიგანტებმა, როგორებიცაა Goldman Sachs და Caterpillar. პარალელურად, S&P 500 0.2%-ით, ხოლო Nasdaq Composite 0.4%-ით შემცირდა.

განსაკუთრებული ყურადღების ცენტრშია SpaceX. კომპანიის აქციები 10%-ზე მეტით გაიზარდა, რამაც მისი საბაზრო კაპიტალიზაცია 2.94 ტრილიონ დოლარამდე აიყვანა. ამ შედეგით SpaceX-მა Microsoft-ს (2.93 ტრილიონი) და Amazon-ს გადაუსწრო და აშშ-ის რიგით მეოთხე უმსხვილესი კომპანია გახდა.

ნავთობის ფასები კვლავ კლების ტენდენციას აჩვენებს. Brent-ის ტიპის ნავთობის ფიუჩერსები 3%-ით, 80 დოლარამდე დაეცა, რაც მარტის შემდეგ პირველი შემთხვევაა. West Texas Intermediate-ის ფასი 77 დოლარის ფარგლებში მერყეობს.

ეკონომიკური მონაცემები აჩვენებს, რომ მაისში იმპორტის ფასები მოლოდინზე მეტად, 1.9%-ით გაიზარდა. წლიურ ჭრილში ზრდამ 6.7% შეადგინა, რაც 2022 წლის აგვისტოს შემდეგ ყველაზე მაღალი მაჩვენებელია. ენერგომატარებლების გაძვირება, განსაკუთრებით საწვავის, ინფლაციურ წნეხს ზრდის.

ინვესტორების განწყობაზე გავლენას ახდენს ფედერალური სარეზერვო სისტემის (Fed) მოახლოებული შეხვედრაც. ანალიტიკოსები ვარაუდობენ, რომ კევინ ვორშის ხელმძღვანელობით Fed-ი მკაცრ მონეტარულ პოლიტიკას შეინარჩუნებს. გამოკითხული ფონდების მენეჯერების 55% „ჰოუკურ“ (მკაცრ) პოზიციას ელოდება.

სამრეწველო სექტორი კვლავ ლიდერობს ბაზარზე. State Street Industrial Sector ETF-მა ისტორიულ მაქსიმუმს მიაღწია. ინვესტორები აქტიურად ანაცვლებენ კაპიტალს ინფრასტრუქტურულ, აეროკოსმოსურ და თავდაცვის სექტორებში, რაც მწარმოებლური საქმიანობის გააქტიურებაზე მიუთითებს.

ამასთან, Robinhood-მა განაცხადა, რომ სამუშაო ძალის 10%-ს შეამცირებს, რამაც კომპანიის აქციების 1%-იანი ზრდა გამოიწვია. პარალელურად, SpaceX-მა დაადასტურა AI კოდირების სტარტაპ Cursor-ის შეძენა 60 მილიარდ დოლარად, რაც კომპანიის ტექნოლოგიური ამბიციების კიდევ ერთი დასტურია.

3 ფოტო — დააჭირე გასადიდებლად