ინვესტორები, რომლებიც პასიურ სტრატეგიებს ირჩევენ, მალე იძულებულნი გახდებიან, თავიანთ პორტფელებში ილონ მასკის აეროკოსმოსური გიგანტის, SpaceX-ის წილები აღმოაჩინონ. კომპანიის ინტეგრაცია მსოფლიოს უმსხვილეს საბირჟო ფონდებში (ETF) ზაფხულის განმავლობაში დასრულდება, რაც მრავალი ამერიკელი დამზოგველისთვის მოულოდნელ ცვლილებას ნიშნავს.

SpaceX-ს ხშირად ადარებენ ბიტკოინს: ორივე აქტივს არ აქვს მოგება, არ გასცემს დივიდენდს და ხასიათდება უკიდურესი ფასობრივი მერყეობით. თუმცა, განსხვავება არსებითია — ბიტკოინის ფლობა ნებაყოფლობითია, მაშინ როდესაც ინდექსური ფონდების მფლობელებს არჩევანი არ აქვთ.

Nasdaq-ის მანდატს უკვე დაეთანხმნენ ისეთი გიგანტები, როგორებიც არიან Vanguard, FTSE Russell და MSCI. აიმან საიდი, Strategic Investment Solutions-ის პარტნიორი, ამ ნაბიჯს მკაცრად აკრიტიკებს და აცხადებს, რომ ფონდების მმართველები, რომლებიც ინდექსებს ბრმად მიჰყვებიან, „ამერიკელი დამზოგველების ინტერესებს ღალატობენ“.

SpaceX-ის საბაზრო კაპიტალიზაცია 2.7 ტრილიონ დოლარს აღწევს, რაც მას მსოფლიოს მეხუთე უმსხვილეს კომპანიად აქცევს. პრობლემა ისაა, რომ კომპანიის იმპლიციტური ვოლატილობა (მერყეობა) 120-ს შეადგენს, რაც დაახლოებით სამჯერ აღემატება iShares-ის ბიტკოინის ETF-ის (IBIT) მაჩვენებელს. შედეგად, SpaceX ხდება S&P 500-ისა და Nasdaq 100-ის ყველაზე არასტაბილური კომპანია.

ბაზრის დისტორაცია თუ ახალი რეალობა?

ექსპერტების ნაწილი მიიჩნევს, რომ ეს ცვლილება ბაზარზე შესამჩნევ კვალს დატოვებს. კევინ კელი, Delphi Digital-ის თანადამფუძნებელი, აღნიშნავს, რომ თუ ინვესტორი ალერგიულია მაღალი რისკის მიმართ, ახლა საუკეთესო დროა, მხოლოდ ობლიგაციებით შემოიფარგლოს.

თუმცა, არსებობს ოპტიმისტური სცენარებიც. ნოელ სმიტი, Convex Asset Management-ის დამფუძნებელი, ვარაუდობს, რომ ინდექსში შესვლა კომპანიის ვოლატილობას შეამცირებს. მისი თქმით, პასიური ფულადი ნაკადები და მაღალი ლიკვიდურობა, რომელიც ინდექსურ ვაჭრობას ახლავს, ფასის მკვეთრ რყევებს გაანეიტრალებს.

3 ფოტო — დააჭირე გასადიდებლად

მიუხედავად ამისა, ფაქტი რჩება: ინვესტორები, რომლებიც მზად არ იყვნენ კოსმოსური ინდუსტრიის „ამერიკული მთების“ მსგავსი რყევებისთვის, ახლა იძულებითი მონაწილეები ხდებიან. უახლოეს თვეებში გახდება ნათელი, გაუძლებს თუ არა ტრადიციული პორტფელები ამ ტიპის აქტივის ზეწოლას.