ზუსტად 11 წელი გავიდა თბილისის ისტორიაში ყველაზე დამანგრეველი წყალდიდობიდან. 2015 წლის 13 ივნისის გვიან ღამით, მდინარე ვერეს ხეობაში მოსულმა ანომალიურმა ნალექმა და მეწყრულმა პროცესებმა დედაქალაქის ცენტრი სრულიად შეცვალა.

მთებიდან წამოსულმა მილიონამდე კუბურმა მეტრმა მიწამ მდინარის კალაპოტი გადაკეტა და წყალი დამანგრეველ ნაკადად აქცია. ღვარცოფმა, რომელსაც თან ლოდები და ხეები მოჰქონდა, გზაში ყველაფერი გაანადგურა.

სტიქიამ წაიღო ავტომობილები, ხიდები და საცხოვრებელი სახლები. განსაკუთრებით დაზარალდა სვანიძის ქუჩა, „მზიურის“ პარკი და თბილისის ზოოპარკი გმირთა მოედანზე. ოფიციალური მონაცემებით, დაიღუპა 21 ადამიანი, ორი მოქალაქე კი დღემდე უგზო-უკვლოდ დაკარგულად ითვლება.

ტრაგედიის ერთ-ერთი ყველაზე მძიმე სიმბოლო ზოოპარკი გახდა, სადაც ბინადრების ნახევარზე მეტი დაიღუპა. უსაფრთხოების მიზნით, სპეციალისტებს რამდენიმე ცხოველის ლიკვიდაციაც მოუწიათ. თუმცა, იმ ღამეს მსოფლიომ გაიცნო ბეგემოტი „ბეგი“, რომელიც დატბორილ კოსტავას გამზირზე თავისუფლად გადაადგილდებოდა.

2 ფოტო — დააჭირე გასადიდებლად

მიუხედავად 90 მილიონ ლარზე მეტი მატერიალური ზიანისა, 13 ივნისი საზოგადოებას ახსოვს, როგორც უპრეცედენტო სოლიდარობის დღე. მეორე დილითვე ათასობით მოხალისე, სტუდენტი, მსახიობი თუ რიგითი მოქალაქე ქუჩაში გამოვიდა, რათა ხელით გაეწმინდათ ქალაქი ტალახისა და ნანგრევებისგან.

დღეს, სტიქიის ზონაში მემორიალებია აღმართული. ჭაბუა ამირეჯიბის გზატკეცილზე მდებარე ძეგლი იმ 21 დაღუპულს ახსენებს, მათ შორის მაშველ ზურაბ მუზაშვილს, რომელმაც სიცოცხლის ფასად ექვსი ადამიანის გადარჩენა შეძლო. პარკ „მზიურში“ კი „ბეგის“ ქანდაკება დგას, როგორც იმ მძიმე ღამის ერთგვარი სიმბოლო.

2 ფოტო — დააჭირე გასადიდებლად

თბილისის ზოოპარკის სრული რეაბილიტაცია დღემდე გრძელდება. ახალი, თანამედროვე კომპლექსის მშენებლობა თბილისის ზღვის მიმდებარედ წლებია მიმდინარეობს, სადაც ცხოველების ნაწილი უკვე გადაყვანილია.