პარტია „გახარია საქართველოსთვის“ არჩევნებში დამოუკიდებლად მონაწილეობას გეგმავს. ამის შესახებ პოლიტიკური გაერთიანების ერთ-ერთმა ლიდერმა, ანა ბუჩუკურმა „პალიტრანიუსის“ ეთერში ისაუბრა.

ბუჩუკურმა უპასუხა კითხვას, თუ როგორი იქნება მათი სტრატეგია არჩევნების შემთხვევაში. მისი თქმით, პარტიის პოზიცია მკაფიოა და ისინი არავისთან გაერთიანებას არ აპირებენ.

კრიტიკა ზურაბიშვილის მისამართით

ანა ბუჩუკურმა საქართველოს პრეზიდენტის, სალომე ზურაბიშვილის მოწოდება „ეროვნული გაერთიანების“ შესახებ მწვავედ გააკრიტიკა. მისი თქმით, პოლიტიკურ სივრცეში არსებული მუდმივი გადაჯგუფებები დამღლელია როგორც პოლიტიკოსებისთვის, ისე რიგითი ამომრჩევლისთვის.

„დამღლელია, რამდენჯერ შეიძლება შეყრა და გაყრას ვუყუროთ. სალომე ზურაბიშვილისგან არაერთხელ მოგვისმენია მსგავსი მოწოდებები, რომლებიც, როგორც წესი, დუმილით სრულდება“, — განაცხადა ბუჩუკურმა.

განსხვავებული „დნმ“ და პოლიტიკური რეალობა

ბუჩუკურის განმარტებით, შეუძლებელია ისეთი პოლიტიკური სუბიექტების გაერთიანება, რომლებსაც არა მხოლოდ წარსული, არამედ იდეოლოგიური საფუძვლებიც რადიკალურად განსხვავებული აქვთ. მან ხაზი გაუსვა, რომ მათი პარტია „ნაციონალური მოძრაობისგან“ პოლიტიკურად სრულიად განსხვავებული მოცემულობაა.

„არ შეიძლება ყბადაღებული გაერთიანების თემა თავზე მოახვიო სუბიექტებს, რომელთაც დნმ-ის დონეზე სხვადასხვანაირი ხედვები აქვთ. ყოველ ჯერზე, როდესაც ასეთი საუბრები ისმის, ის კრახით სრულდება“, — აღნიშნა მან.

პოლიტიკოსმა დასძინა, რომ მისთვის გაუგებარია პრეზიდენტის რეალური გეგმები. ბუჩუკურის თქმით, სალომე ზურაბიშვილმა თავად უნდა განმარტოს, თუ რას გულისხმობს „ერთიან ფრონტში“.

ამ ეტაპზე პარტია „გახარია საქართველოსთვის“ არცერთ სხვა პოლიტიკურ ძალასთან მოლაპარაკებებს არ აწარმოებს და საკუთარ დამოუკიდებელ პოლიტიკურ დღის წესრიგზე აკეთებს აქცენტს.