სომხეთმა, 7 ივნისს დაგეგმილ საპარლამენტო არჩევნებამდე ერთი კვირით ადრე, 2016 წლის შემდეგ პირველი მასშტაბური სამხედრო აღლუმი გამართა. რესპუბლიკის დღისადმი მიძღვნილი ღონისძიება ერევნის რესპუბლიკის მოედანზე ორ საათზე მეტხანს გაგრძელდა.

ახალი შეიარაღება და დოქტრინა

აღლუმზე წარმოდგენილი იყო შვიდი ქვეყნიდან, მათ შორის საფრანგეთიდან და ინდოეთიდან შესყიდული სამხედრო ტექნიკა. ყურადღება გამახვილდა სომხური წარმოების დრონებზეც, რომელთა ექსპორტიც ქვეყანამ მიმდინარე წლის მაისში დაიწყო.

პრემიერ-მინისტრმა ნიკოლ ფაშინიანმა სიტყვით გამოსვლისას აღნიშნა, რომ სომხეთი ახალ ისტორიულ კონტექსტში იმყოფება. მისი თქმით, 35-წლიანი კონფლიქტის შემდეგ, აზერბაიჯანთან მშვიდობა ფაქტობრივად დამყარებულია.

„არმიის ერთადერთი მისია სომხეთის საერთაშორისოდ აღიარებული სუვერენული ტერიტორიის დაცვაა. ჩვენი არმია არ უნდა იქნას გამოყენებული ქვეყნის საზღვრებს გარეთ, გარდა საერთაშორისო ხელშეკრულებებით გათვალისწინებული სამშვიდობო მისიებისა“, - განაცხადა ფაშინიანმა.

პრემიერმა ხაზი გაუსვა, რომ 2022 წლამდე იარაღის საერთაშორისო ბაზარი სომხეთისთვის დიდწილად დახურული იყო. მისი განმარტებით, საერთაშორისო პარტნიორები შიშობდნენ, რომ სომხეთი იარაღს ქვეყნის ფარგლებს გარეთ გამოიყენებდა. ამჟამად მთავრობა თავდაცვის ინდუსტრიაში 170 მილიარდ დრამამდე (დაახლოებით 460 მილიონი აშშ დოლარი) ინვესტიციას ახორციელებს.

პოლიტიკური შეფასებები

აღლუმს ოპოზიციური სპექტრი კრიტიკულად შეხვდა. ყოფილმა პრეზიდენტმა რობერტ ქოჩარიანმა ფაშინიანის ქმედებები საქართველოს ყოფილი პრეზიდენტის, მიხეილ სააკაშვილის 2007-2008 წლების სამხედრო აღლუმებს შეადარა. ქოჩარიანმა პრემიერი „გეოპოლიტიკურ თამაშებში“ ჩართვასა და საზოგადოების მოტყუებაში დაადანაშაულა.

თავის მხრივ, პარტია „ძლიერი სომხეთის“ წარმომადგენლებმა განაცხადეს, რომ სამხედრო აღლუმი უსაფრთხოების ილუზიის შექმნას ისახავს მიზნად. ოპოზიციური ძალები მიიჩნევენ, რომ რეალური უსაფრთხოება ძლიერი ეკონომიკითა და დიპლომატიით შენდება და არა საჩვენებელი ღონისძიებებით.

მიუხედავად კრიტიკისა, სომხეთის ხელისუფლება აღლუმს საკუთარი საზოგადოებისთვის ანგარიშად განიხილავს, სადაც წარადგინეს ახალი შეიარაღება, ახალი უნიფორმები და არმიის განახლებული დოქტრინა.