მსოფლიო ჩემპიონატის G ჯგუფის პირველი ტური სიეტლის „ლიუმენ ფილდზე“ დაძაბული დაპირისპირებით გაიხსნა. ბელგიისა და ეგვიპტის ეროვნულმა ნაკრებებმა ქულები გაიყვეს — მატჩი ფრედ, 1:1 დასრულდა.

შეხვედრა მაღალი ტემპით წარიმართა და გულშემატკივრებს ორივე კარის მიმართულებით მწვავე მომენტები შესთავაზა. საწყის წუთებში ინიციატივას ეგვიპტელები დაეუფლნენ, რაც შედეგიანი გამოდგა.

მე-19 წუთზე აშურმა შორი მანძილიდან უძლიერესი დარტყმით აიღო ტიბო კურტუას კარი და თავისი გუნდი დააწინაურა. ბელგიელებმა გაშვებული გოლის შემდეგ თამაში გაამწვავეს და ანგარიშის გათანაბრებას აქტიურად შეეცადნენ.

კევინ დე ბრუინს გატანის რეალური შანსი ჰქონდა, თუმცა ბურთი ძელს მოხვდა. ზეწოლა 66-ე წუთზე გამართლდა: მოედანზე შეცვლაზე შემოსულმა რომელუ ლუკაკუმ ზუსტი დარტყმით აღადგინა წონასწორობა. დარჩენილ დროში ორივე გუნდი გამარჯვების გოლს ეძებდა, თუმცა საბოლოო ანგარიში უცვლელი დარჩა.

რა ელოდებათ გუნდებს მომდევნო ტურში?

G ჯგუფში სიტუაცია საკმაოდ დაძაბულია. 16 ივნისს ჯგუფის მეორე შეხვედრაში ირანი ახალ ზელანდიას დაუპირისპირდება, რაც სატურნირო ცხრილს უფრო მკაფიოს გახდის.

2 ფოტო — დააჭირე გასადიდებლად

მომდევნო ტურის კალენდარი ასე გამოიყურება:

  • 21 ივნისი: ბელგია - ირანი
  • 22 ივნისი: ახალი ზელანდია - ეგვიპტე