თურქეთის პოლიციამ სტამბოლში მასშტაბური საგამოძიებო მოქმედებები განახორციელა, რომლის შედეგადაც ნარკოტიკების მოხმარებასთან და პროსტიტუციის ორგანიზებასთან დაკავშირებული დანაშაულებრივი სქემის მონაწილეობის ეჭვით 22 პირი დააკავა. დაკავებულთა შორის თურქული შოუბიზნესის არაერთი გავლენიანი სახე ფიგურირებს.

სამართალდამცავების მიერ გავრცელებული ინფორმაციით, დაკავებულთა სიაში არიან მსახიობი ბერენ საათი და მისი მეუღლე, ცნობილი მუსიკოსი ქენან დოღულუ. მათთან ერთად, პოლიციამ აიყვანა მუსიკოსი ოზან დოღულუ, მსახიობი ენის არიქანი, მომღერალი ბერდან მარდინი და სოციალური მედიის გავლენიანი ფიგურა ქერიმჯან დურმაზი.

3 ფოტო — დააჭირე გასადიდებლად

ოპერაცია სტამბოლში მიმდინარე კომპლექსური გამოძიების ნაწილია. სამართალდამცავები შეისწავლიან კავშირებს ნარკოტიკულ საშუალებებთან და სექსუალური მომსახურების არაკანონიერ ორგანიზებასთან. აღნიშნულმა ფაქტმა თურქულ მედიასა და საზოგადოებაში დიდი რეზონანსი გამოიწვია, ვინაიდან საქმე ეხება ქვეყნის ყველაზე რეიტინგულ ვარსკვლავებს.

დაკავების პროცედურის დასრულების შემდეგ, ყველა ფიგურანტი ჯერ სამედიცინო შემოწმებაზე გადაიყვანეს, რის შემდეგაც ისინი სტამბოლის ნარკოტიკებთან ბრძოლის განყოფილებაში გადაიყვანეს დაკითხვისთვის. პოლიცია ჯერჯერობით სხვა დეტალებს არ ასაჯაროებს.

შემთხვევა კიდევ ერთხელ უსვამს ხაზს თურქეთის სამართალდამცავი ორგანოების გააქტიურებას კრიმინალურ წრეებთან დაკავშირებულ საქმეებზე, მიუხედავად ეჭვმიტანილთა სოციალური სტატუსისა თუ პოპულარობისა.