ჩეხეთის რესპუბლიკა აზერბაიჯანიდან ნავთობისა და გაზის მიწოდების ახალი მარშრუტის ათვისებას გეგმავს. პრემიერ-მინისტრმა ანდრეი ბაბიშმა მონტენეგროში ჟურნალისტებთან საუბრისას დაადასტურა, რომ პრაღა ამ მიზნით უკრაინის სატრანზიტო პოტენციალის გამოყენებას აპირებს.

აღნიშნული საკითხი მაისში, სომხეთში გამართული ევროპის პოლიტიკური გაერთიანების (EPC) სამიტის ფარგლებში განიხილეს. ბაბიშის განცხადებით, მან პირადად მიმართა უკრაინის პრეზიდენტ ვოლოდიმირ ზელენსკის, შესაძლებელი იყო თუ არა აზერბაიჯანული ენერგორესურსების ტრანზიტი უკრაინის ტერიტორიაზე. პრეზიდენტის პასუხი დადებითი იყო.

ზელენსკიმ ბაბიშთან შეხვედრა „პროდუქტიულად“ შეაფასა. სოციალურ ქსელ X-ზე გამოქვეყნებულ პოსტში უკრაინის ლიდერმა აღნიშნა, რომ ორ ქვეყანას შორის თანამშრომლობის გაღრმავების რეალური პოტენციალი არსებობს და მადლობა გადაუხადა ჩეხეთს მტკიცე მხარდაჭერისთვის.

3 ფოტო — დააჭირე გასადიდებლად

პრემიერ-მინისტრ ბაბიშის თქმით, აზერბაიჯანი ამჟამად ჩეხეთისთვის ნავთობის ერთ-ერთი უმსხვილესი მომწოდებელია. შესაბამისად, ოფიციალური პრაღისთვის პრიორიტეტულია აზერბაიჯანთან გაფორმებული ყველა ხელშეკრულების სრულფასოვანი შესრულება.

ენერგეტიკული უსაფრთხოების გარდა, ქვეყნები ეკონომიკური კავშირების გაფართოებაზეც მუშაობენ. ბაბიშის განცხადებით, მიმდინარეობს მოლაპარაკებები ერთობლივი საწარმოების შექმნის თაობაზე, რაც ორი სახელმწიფოს საწარმოო შესაძლებლობებს გააერთიანებს.

ამჟამად ჩეხეთი აქტიურად ცდილობს ევროპული ენერგეტიკული ბაზრის დივერსიფიკაციას, რათა შეამციროს დამოკიდებულება ტრადიციულ მომწოდებლებზე და გაზარდოს მიწოდების უსაფრთხოება კასპიის რეგიონის რესურსების ხარჯზე.