„დემოკრატიის კვლევის ინსტიტუტი“ (DRI) ეხმიანება ტელეკომპანია „პირველის“ ეთერში გასულ კადრებს, სადაც პოლიციელების მხრიდან მოქალაქის მიმართ წამებისა და არაადამიანური მოპყრობის ფაქტებია ასახული. ორგანიზაციის შეფასებით, შინაგან საქმეთა სამინისტროს განცხადება, რომელიც ფაქტის აღიარებას გულისხმობს, მეტ კითხვას აჩენს, ვიდრე პასუხს სცემს.

გასაჯაროებულ ვიდეომასალაში ნათლად ჩანს, როგორ ცდილობენ სამართალდამცავები სასურველი ჩვენების მიღებას მოქალაქისთვის თავის არეში გამეტებით დარტყმით. DRI ხაზს უსმევს, რომ ეს ქმედებები არა მხოლოდ დანაშაულებრივი, არამედ სისტემური ხასიათის მატარებელია.

დაუსმელი კითხვები და უნდობლობა

შინაგან საქმეთა სამინისტრომ განმარტა, რომ ინციდენტი 2022 წელს მოხდა, ხოლო მონაწილე პოლიციელები 2026 წლის თებერვალში დააკავეს. თუმცა, ინსტიტუტი მოითხოვს პასუხებს კონკრეტულ საკითხებზე: რატომ დასჭირდა უწყებას წლები იდენტიფიცირებადი პირების დასაკავებლად და რატომ გაიგო საზოგადოებამ ამის შესახებ მხოლოდ მედიის საშუალებით?

3 ფოტო — დააჭირე გასადიდებლად

ორგანიზაცია ასევე აკრიტიკებს გამოძიების მიდგომას, სადაც წამების ნაცვლად, ბრალდებები ხშირად „უფლებამოსილების გადამეტებით“ შემოიფარგლება. ეს მიდგომა, DRI-ს შეფასებით, წამებას სისტემის განუყოფელ ნაწილად აქცევს.

სისტემური კრიზისი და წარსული გამოცდილება

ანგარიშში ყურადღება გამახვილებულია 2024 წლის ნოემბერ-დეკემბრის საპროტესტო აქციების დარბევაზეც. მაშინ, მიუხედავად მრავალი მტკიცებულებისა, პროკურატურამ მხოლოდ რამდენიმე თანამშრომელს წარუდგინა ბრალი, ხოლო 2025 წელს, ადამიანის უფლებების დარღვევისთვის სანქცირებულ მაღალჩინოსნებს სახელმწიფო ჯილდოები გადაეცათ.

„უწყებების მხრიდან უმძიმეს დანაშაულებზე ფასადური რეაგირება, მინიმალურადაც ვერ ამცირებს ქვეყანაში შექმნილ მწვავე კრიზისს“, - აცხადებენ ორგანიზაციაში. ისინი შიშობენ, რომ პოლიციური ძალადობა ქვეყანაში „საპოლიციო ღონისძიების“ სტანდარტულ მეთოდად იქცა.