ევროკომისიამ 2026 წლის გაზაფხულის ეკონომიკური პროგნოზი გამოაქვეყნა, სადაც საქართველოს ეკონომიკური განვითარების პერსპექტივებიც შეაფასა. დოკუმენტის მიხედვით, ევროკავშირის აღმასრულებელმა ორგანომ საქართველოს 2026 წლის ზრდის მოლოდინი 5.3%-დან 5.5%-მდე გაზარდა.

სტაბილური ეკონომიკური ზრდა

ანგარიშში აღნიშნულია, რომ 2025 წელს საქართველოს ეკონომიკა 7.5%-ით გაიზარდა, რაც 2024 წლის 9.7%-იან მაჩვენებელზე ოდნავ ნაკლებია, თუმცა მაინც მაღალ ნიშნულს ინარჩუნებს. ევროკომისიის პროგნოზით, 2026 და 2027 წლებში საქართველოს მშპ-ს ზრდა 5-5.5%-ის ფარგლებში შენარჩუნდება.

ეკონომიკური ზრდის მთავარ მამოძრავებელ ძალად კვლავ მომსახურების სექტორი სახელდება, კერძოდ, საინფორმაციო და საკომუნიკაციო ტექნოლოგიები (ICT), განათლება და ტურიზმი. ექსპერტების შეფასებით, კერძო და საჯარო მოხმარება, რეალური ხელფასების ზრდა და სამომხმარებლო დაკრედიტება ეკონომიკურ აქტივობას მომავალშიც მხარს დაუჭერს.

გარე ფაქტორები და ინფლაცია

ანგარიში ყურადღებას ამახვილებს გლობალურ გამოწვევებზე. მიუხედავად იმისა, რომ ახლო აღმოსავლეთში მიმდინარე კონფლიქტის გავლენა საქართველოს ეკონომიკაზე შეზღუდულია, ის ძირითადად ენერგომატარებლების ფასების ზრდის არხით ვლინდება.

ევროკომისიის ცნობით, 2026 წელს ინფლაცია საწვავისა და ენერგიის მაღალი ფასების გამო შედარებით მაღალი იქნება, თუმცა 2027 წლისთვის ის ეტაპობრივად დაუბრუნდება 3%-იან სამიზნე ნიშნულს. ამასთან, ანგარიშში ხაზგასმულია, რომ 2025 წელს მიმდინარე ანგარიშის დეფიციტი მშპ-ს 2.7%-მდე შემცირდა, რაც მომსახურების სექტორში არსებულმა ჭარბმა შემოსავლებმა და ფულადმა გზავნილებმა განაპირობა.

ევროკომისიის ანგარიშში დადებითად არის შეფასებული საქართველოს მიერ 500 მილიონი აშშ დოლარის ღირებულების ევრობონდების წარმატებული განთავსება 5.125%-იან განაკვეთში, რაც ქვეყნისადმი ინვესტორთა ნდობაზე მიუთითებს.

საერთო ჯამში, ევროკომისია საქართველოს ეკონომიკურ პერსპექტივებს პოზიტიურად აფასებს და აღნიშნავს, რომ ქვეყნის ეკონომიკური მაჩვენებლები კვლავ მყარი რჩება, რაც გრძელვადიანი პოტენციალის შესაბამისია.