12 ივნისს Meta-ს ყველაზე პოპულარულმა პლატფორმებმა, Facebook-მა და Messenger-მა, გლობალური მასშტაბით მუშაობა შეწყვიტეს. შეფერხება შეეხო როგორც ვებ-ვერსიებს, ისე მობილურ აპლიკაციებს მთელი მსოფლიოს მასშტაბით.

მომხმარებელთა დიდი ნაწილი აცხადებს, რომ აპლიკაციები მათ ავტომატურად გამოდევნის სისტემიდან, ხელახალი ავტორიზაციის მცდელობა კი წარუმატებელია. სერვისების გახსნისას ეკრანზე ჩნდება შეტყობინებები: „დაფიქსირდა მოულოდნელი შეცდომა“ ან უბრალოდ „რაღაც შეცდომაა“.

ამ დროისთვის არსებული ინფორმაციით, შეფერხება მასობრივი ხასიათისაა და არ არის დამოკიდებული კონკრეტულ რეგიონზე ან ინტერნეტ პროვაიდერზე. ტექნიკური პრობლემა უშუალოდ Meta-ს სერვერების მხარეს ფიქსირდება.

რა არის ცნობილი პრობლემაზე?

მედიაში გავრცელებული ცნობებით, Meta-ს საინჟინრო გუნდი უკვე მუშაობს ხარვეზების აღმოფხვრაზე. თუმცა, კომპანიას ოფიციალური განცხადება ან განმარტება, თუ რა გახდა გლობალური გათიშვის მიზეზი, ჯერჯერობით არ გაუკეთებია.

სოციალური ქსელების მომხმარებლები სხვა პლატფორმების მეშვეობით აქტიურად აზიარებენ ინფორმაციას იმის შესახებ, რომ პლატფორმები არ იტვირთება. ეს არ არის პირველი შემთხვევა, როდესაც Meta-ს სერვისები გლობალურად წყვეტს ფუნქციონირებას, თუმცა მსგავსი მასშტაბის შეფერხება ყოველთვის იწვევს დისკომფორტს მილიონობით ადამიანისთვის.

ამ ეტაპზე გაურკვეველია, რამდენი ხანი დასჭირდება სისტემის სრულად აღდგენას. მომხმარებლებს ურჩევენ, თავი შეიკავონ პაროლების მასობრივი ცვლისგან, რადგან პრობლემა არა ანგარიშების უსაფრთხოებაში, არამედ პლატფორმის ტექნიკურ გამართულობაშია.