ჭადრაკის საერთაშორისო ფედერაციამ (FIDE) რუსეთის ჭადრაკის ფედერაციის წევრობა ოფიციალურად შეაჩერა. მიზეზი რუსული მხარის მიერ სპორტის საარბიტრაჟო სასამართლოს (CAS) გადაწყვეტილების იგნორირება გახდა.

საარბიტრაჟო სასამართლომ რუსეთს უკრაინის ოკუპირებულ ტერიტორიებზე, მათ შორის ანექსირებულ ყირიმში, ტურნირების გამართვა აუკრძალა. მოსკოვს ამ ვალდებულების შესასრულებლად 90-დღიანი ვადა ჰქონდა მიცემული, თუმცა რუსულმა მხარემ სასამართლოს დირექტივა არ გაითვალისწინა.

სამართლებრივი დავა და გადაწყვეტილება

აღნიშნული დავა უკრაინის მიერ იყო ინიცირებული. მას შემდეგ, რაც FIDE-ს ეთიკის კომისიამ 2024 წლის სექტემბერში რუსეთის ფედერაცია მხოლოდ 45 ათასი დოლარით დააჯარიმა, უკრაინამ საქმე სპორტის საარბიტრაჟო სასამართლოში გაასაჩივრა.

CAS-მა 11 მარტს მიიღო გადაწყვეტილება, რომლითაც რუსეთის ფედერაციას ოკუპირებულ ტერიტორიებზე შეჯიბრებების ჩატარება აეკრძალა. ვადის ამოწურვის შემდეგ, სასამართლომ ფედერაციას აცნობა, რომ მოთხოვნა კვლავ შეუსრულებელი იყო.

შედეგად, 10 ივნისს FIDE-ს საბჭომ რუსეთის ჭადრაკის ფედერაციის წევრობის შეჩერების განკარგულება გასცა. შეზღუდვა ძალაში მანამ დარჩება, სანამ რუსეთი დაკისრებულ ვალდებულებებს არ შეასრულებს.

რა იცვლება მოჭადრაკეებისთვის?

მიუხედავად ფედერაციისთვის დაწესებული სანქციებისა, რუს მოჭადრაკეებს კვლავ რჩებათ საერთაშორისო ტურნირებში მონაწილეობის უფლება. თუმცა, ისინი ამას FIDE-ს მიერ დადგენილი მკაცრი პირობების დაცვით შეძლებენ.

შეგახსენებთ, რომ 2018 წლიდან ჭადრაკის საერთაშორისო ფედერაციას არკადი დვორკოვიჩი ხელმძღვანელობს, რომელიც წარსულში რუსეთის პრეზიდენტის თანაშემწე და ვიცე-პრემიერი იყო.