საქართველოს 7-კაცა ნაკრებმა პორტუგალიის ქალაქ ალგარვეში გამართულ მოსამზადებელ ტურნირზე მაღალი სათამაშო კლასი აჩვენა. ქართველმა მორაგბეებმა ექვსი შეხვედრიდან ხუთი გამარჯვებით დაასრულეს და ტურნირის ფინალში გასვლა შეძლეს.

ტურნირის პირველი დღე საქართველოს ნაკრებისთვის იდეალური გამოდგა. ჯგუფურ ეტაპზე გუნდმა სამივე მატჩი მოიგო: „კაშკაის“ 19:17 სძლია, შვეიცარიას 14:7 მოუგო, ხოლო ჩინეთის ნაკრები 12:5 დაამარცხა.

პლეი-ოფის დრამა და ნახევარფინალი

თასის 1/4-ფინალში საქართველოს ნაკრები „ოქსფამ კურასდერს“ დაუპირისპირდა. მატჩის დასაწყისში მეტოქე 5:0 დაწინაურდა, თუმცა ქართველმა მორაგბეებმა თამაშის შემოტრიალება მოახერხეს. იაგო ხაბულიანის ლელოს გიორგი ბაბუნაშვილის გარდასახვა მოჰყვა, მეორე ტაიმში კი ხაბულიანმა დუბლი გაიფორმა. საბა არჩვაძის გადამწყვეტი ლელოსა და ზუსტი გარდასახვის შემდეგ, საქართველომ 19:12 გაიმარჯვა.

ნახევარფინალში „სევენტისთან“ შეხვედრა სრული უპირატესობით წარიმართა. საქართველომ 6 ლელო გაიტანა და 34:5 გაიმარჯვა. ანგარიში საბა არჩვაძემ გახსნა, რასაც ლუკა ალიბეგაშვილის, დავით კვირიკაშვილისა და ნიკოლოზ რეხვიაშვილის ლელოები მოჰყვა.

2 ფოტო — დააჭირე გასადიდებლად

ფინალური დაპირისპირება

ტურნირის ფინალში საქართველოს მეტოქე მასპინძელი პორტუგალია იყო. პირველი ტაიმი მეტოქის უპირატესობით წარიმართა და პორტუგალიელები 12:0 დაწინაურდნენ. მეორე ტაიმში მატიას მოდებაძემ ერთი ლელო გაქვითა, თუმცა შეხვედრა საბოლოოდ 5:12 დასრულდა, რითაც საქართველომ ტურნირზე მეორე ადგილი დაიკავა.